ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ބަނގުލާދޭޝްގެ އިންތިޤާލީ ސަރުކާރުގެ ޗީފް އެޑްވައިޒަރުގެ މަޤާމަށް ޑރ. މުޙައްމަދު ޔޫނުސް އައްޔަންކުރެއްވުމާ ގުޅިގެން ތަހުނިޔާ ފޮނުއްވައިފިއެވެ.
މިއަދު ސޯޝަލް މީޑިއާ ޕްލެޓްފޯމް އެކްސްގައި ކުރެއްވި ޕޯސްޓެއްގައި ރައީސް ޑރ.މުޢިއްޒު ވިދާޅުވެފައިވަނީ، ދިގު މުއްދަތެއްގެ ރަޙްމަތްތެރިއެއްގެ ހައިސިއްޔަތުންނާއި ގާތް ބައިވެރިއެއްގެ ގޮތުން، ޑރ. ޔޫނުސްގެ ވެރިކަމުގެ ދަށުން ބަނގުލާދޭޝްގެ ރައްޔިތުންނަށް އެއްބައިވަންތަކަމާއި، ސުލްޙަވެރިކަމާއި، ފާގަތިކަން ލިބުމަށް ދިވެހިރާއްޖެއިން އެދޭ ކަމަށެވެ.
ޑރ. މުޙައްމަދު ޔޫނުސްއަކީ ނޮބެލް ހާސިލުކުރައްވާފައިވާ އިޤްތިޞާދީ މާހިރެއް ކަމާއި، ބަނގުލާދޭޝްގެ ކުރިއެރުމަށް ގިނަގުނަ ޚިދުމަތްތަކެއް ކުރައްވާފައިވާ ބޭފުޅެއްކަން ފާހަގަކޮށްލެވެއެވެ. އޭނާ މި މަޤާމަށް އައްޔަންކުރެއްވުމަކީ ބަނގުލާދޭޝްގެ ސިޔާސީ މަޝްރަޙުގައި މުހިންމު ބަދަލެއް ކަމުގައި ބެލެވެއެވެ.
ބަނގްލާދޭޝްގައި ވަގުތީ ސަރުކާރެއް އެކުލަވާލައި ޑރ.ޔޫނުސް އެސަރުކާރުގެ ޗީފް އެޑްވައިޒަރުގެ މަޤާމަށް ހަމަޖައްސާފައިވަނީ އެގައުމުގައި 15 އަހަރުގެ ދިގުވެރިކަމެއް ކުރެއްވި ޝޭޚް ހަސީނާ މަޤާމުން އިސްތިއުފާ ދެއްވާ ގައުމުދޫކުރައްވާ އިންޑިއާއަށް ފިލާވަޑައިގަތުމާއި ގުޅިގެންނެވެ.
ހަސީނާ އިސްތިއުފާ ދެއްވީ އެގައުމުގެ ސަރުކާރުގެ ވަޒިފާތައް ވަކިބަޔަކަށް ބޮޑުއިންސައްތައެއް ހަމަޖެއްސުމަށް ކަނޑައެޅި ކޯޓާއާއި މެދު ގިނަބަޔަކު ހިތްހަމަނުޖެހިގެން ކުރިއަށް ގެންދިޔަ މުޒާހަރާތައް ހޫނުވެ ހަމަނުޖެހުންތަކަކަށް ބަދަލުވުމާއި ގުޅިގެން ޕްރެޝަރު ބޮޑުވެގެންނެވެ. އެ ހަމަނުޖެހުންތަކުގައި 400 އަށްވުރެ ގިނަމީހުން ވަނީ މަރުވެފައެވެ.
ދިވެހިރާއްޖެއާއި ބަނގުލާދޭޝްއަކީ އެތައް އަހަރެއްގެ ގުޅުން އޮތް ދެ ޤައުމެއް ކަމާއި، މި ދެ ޤައުމުގެ ދެމެދުގައި އޮތް ގުޅުން އިތުރަށް ބަދަހިވެގެންދާނެ ކަމަށް އުންމީދު ކުރެވެއެވެ.
Advertisement
This content is created and paid for by advertisers and does not involve Voice Journalists
