މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ އޮނިގަނޑަށް ބަދަލު ގެނެސް، އެ އޮތޯރިޓީއަށް ފަސް މެނޭޖިން ޑިރެކްޓަރުން ހޯދުމަށް އިއުލާން ކޮށްފިއެވެ.

މިކަމާ ގުޅިގެން މިއަދު އެމްއެމްއޭއިން ގެޒެޓުގައި ކުރި އިއުލާނުގައި ބުނެފައިވަނީ، އެ އޮތޯރިޓީގެ ފަސް މެނޭޖިން ޑިރެކްޓަރުންގެ މަޤާމަށް، ހުނަރުވެރި، ޤާބިލު އަދި އިޚްލާޞްތެރިކަމާއި ތެދުވެރިކަމާއެކު މަސައްކަތްކުރުމަށް ޝައުޤުވެރިވާ ފަރާތްތައް ބޭނުންވާ ކަމަށެވެ.

އެމްއެމްއޭއިން މެނޭޖިން ޑިރެކްޓަރުން އައްޔަންކުރުމަށް އިއުލާންކޮށްފައިވާ ފަސް ދާއިރާއަކީ މަނިޓަރީ ޕޮލިސީ، ރިސާޗް އެންޑް ސްޓެޓިސްޓިކްސް، ފައިނޭންޝަލް ސްޓެބިލިޓީ، ބޭންކިން އޮޕަރޭޝަންސް، ކޯޕޮރޭޓް ސާވިސަސް އަދި ފައިނޭންޝަލް ސެކްޓާ ޑިވެލޮޕްމަންޓެވެ.

Advertisement

މި މަޤާމުތަކުގެ މުއްދަތަކީ ފަސް އަހަރުގެ ދެ ދައުރު ކަމަށާއި، މުސާރައާއި އިނާޔަތްތަކަކީ 50,000 ރުފިޔާއާއި 55,000 ރުފިޔާއާ ދެމެދުގެ އަދަދެއް ކަމަށް އެމްއެމްއޭއިން ބުނެފައިވެއެވެ.

އިއުލާނުގައި އިތުރަށް ފާހަގަކޮށްފައިވަނީ މި ވަޒީފާތަކަކީ ދެ ޖިންސުގެ މީހުންނަށްވެސް ހަމަހަމަ ފުރުޞަތު އޮތް ވަޒީފާތަކެއް ކަމަށެވެ. އެމްއެމްއޭގެ އޮނިގަނޑަށް މި ބަދަލު ގެނައުމަށް ނިންމާފައިވަނީ އެ އޮތޯރިޓީއަށް ރައީސުލްޖުމްހޫރިއްޔާ އައްޔަންކުރެއްވި އައު ގަވަރުނަރު އަޙްމަދު މުނައްވަރު ކަމަށް ވެއެވެ.

މި ބަދަލުތަކުގެ މަޤްޞަދަކީ އެމްއެމްއޭ ޒަމާނީ ސެންޓްރަލް ބޭންކަކަށް ހެދުން ކަމަށް އެބޭންކުން ބުނެއެވެ.