އަބުރު ކަތިލުމަށްޓަކައި ރާވައިގެން ބަޔަކު ފަތުރާ ދޮގު ވާހަކަތަކަކުން ޑރ.ޝަހީމް ފަހަތަށް ނުޖެއްސޭނެކަމަށް ޕީޕަލްސް ނޭޝަނަލް ކޮންގްރެސް (ޕީއެންސީ) އިން މިރޭ ބުނެފިއެވެ. 

ޕީއެންސީން މިރޭ ނެރުނު ނޫސްބަޔާނެއްގައި ބުނެފައިވަނީ ޑރ ޝަހީމަކީ މުޅި އިސްލާމީ ދުނިޔޭގައިވެސް މަޝްހޫރު އަދި އިސްލާމީ ދައުލަތްތަކުން އެބޭފުޅެއްގެ ޚިދުމަތްތައް އަގުވަޒަންކުރާ ބޭފުޅެއްކަމަށާއި އަބުރުކަތިލުމަށް ބަޔަކު ކުރަމުންދާ މަސައްކަތްތަކާއި، ފަތުރަމުންދާ ދޮގު ވާހަކަތަކެއްގެ ސަބަބުން ފަސްޖެހިވަޑައިގަންނަވާނެ ބޭފުޅެއް ނޫންކަމަށެވެ.

އަދި މީގެ އިތުރުން ޑރ. ޝަހީމުގެ އަބުރުކަތިލުމަށް ހިންގަމުންދާ ކަންކަން ވަގުތުން ހުއްޓާލުމަށްވެސް ޕީއެންސީގެ ބަޔާނުގައި ގޮވާލާފައިވެއެވެ.

އިސްލާމިކް މިނިސްޓަރ ޑރ. ޝަހީމް ގެންދަވަނީ ރައީސް ޑރ. މުޙައްމަދު މުޢިއްޒުގެ ދީނީ ސިޔާސަތުތައް ކުރިއެރުވުމުގައި ސާބިތުކަމާއެކު ނަމޫނާ މަސައްކަތްތަކެއް ކުރައްވަމުންނެވެ.

ރައީސް ޑރ. މުޙައްމަދު މުޢިއްޒުގެ މެނިފެސްޓޯގައި ހިމެނޭ ހުރިހާ ދީނީ ސިޔާސަތުތައް ތަންފީޒުކުރަން ފަށާފައިވާއިރު ޝަހީމް ކުރައްވަމުން ގެންދަވާ މަސައްކަތްތަކަށް ފަޚުރުވެރިވާކަމުގައިވެސް ޕީއެންސީގެ ބަޔާނުގައި ފާހަގަކޮށްފައިވެއެވެ.

ޑރ. ޝަހީމްއާ ބެހޭގޮތުން އިދިކޮޅު ފަރާތްތަކުން ދޮގު ވާހަކަތަކެއް ފަތުރަމުންދާއިރު، އަދި ފޭކް ވީޑިއޯތަކާއި، އެކިއެކި އެޑިޓް ފޮޓޯތައް ޢާއްމުކުރަމުންދާއިރު، ޑރ. ޝަހީމު ރާއްޖޭގައި ދީނީ ކަންކަން ކުރިއެރުވުމަށް ކުރައްވާ މަސައްކަތްތައް ހަޖަމުނުވާ އިދިކޮޅު ފަރާތްތަކުން ވަނީ މީގެ ކުރިންވެސް ޝަހީމްއާބެހޭގޮތުން ދޮގު ވާހަކަތައް ފަތުރައި އަބުރުކަތިލުމަށް މަސައްކަތްކޮށްފައެވެ. އަދި އެކަން ނާކާމިޔާބު ވެފައެވެ.