އަފްޣާނިސްތާނު ސަރުކާރުގެ މުވައްޒަފުން ފަސް ވަގުތު މިސްކިތަށް ނަމާދަށް ނުދާނަމަ އަދަބު ދޭނެ ކަމަށް ތާލިބާނުންގެ އިސް ލީޑަރު ހިބަތުﷲ އަޚުންޒާދާ ވިދާޅުވެއްޖެ އެވެ.
ތާލިބާން ސަރުކާރުގެ ވުޒާރާތަކާއި މުއައްސަސާތަކުގެ އޮފިޝަލުންނަށް، ކަނޑައެޅިފައިވާ ވަގުތުތަކުގައި ޖަމާއަތުގައި ނަމާދުކުރުން ޝަރީއާ އިން ލާޒިމުކަމެއް ކަމަށް އަޚުންޒާދާ ސޮއިކުރައްވައި ނެރުއްވި އަމުރުގައި ހާމަކޮށްފިއެވެ.
އެ އަމުރުގައި ވަނީ މަގުބޫލު އުޒުރަކާނުލައި ޖަމާއަތުގައި ނަމާދު ނުކުރާ މުވައްޒަފުންނަށް އެ މުވައްޒަފެއްގެ ކަންކަމާ ހަވާލުވެ ހުރި ވެރިޔަކު އިންޒާރުދޭން ޖެހޭނެ ކަމަށާއި އިންޒާރުދިނުމުންވެސް އެކަން ތަކުރާރުކޮށްފި ނަމަ އެކަށީގެންވާ އަދަބު ދޭންޖެހޭނެ ކަމަށް ވެސް ބުނެފައިވެ އެވެ.
ޖަމާއަތުގައި ނަމާދު ނުކުރާ މުވައްޒަފުންނަށް ދޭނީ ކޮން އަދަބެއް ކަމެއް އަމުރުގައި ބަޔާން ކޮށްފައި ނުވެއެވެ.
އަދި އެކަމާ ބެހޭ ގޮތުން އޭއެފްޕީން އަފްޣާނިސްތާނު ސަރުކާރުގެ އޮފިޝަލުންނާ ކުރި ސުވާލަށް ޖަވާބުލިބިފައި ނުވާކަމަށް އެ ނޫހުން ވަނީ ހާމަކޮށްފައެވެ.
Advertisement
This content is created and paid for by advertisers and does not involve Voice Journalists
