ބްރެޒިލްގެ ސައޯ ޕައުލޯގެ ބޭރުން ދަތުރުކުރަމުންދިޔަ މަތިންދާ ބޯޓެއް ވެއްޓި، އޭގައި ދަތުރުކުރަމުންދިޔަ 61 މީހުން މަރުވެއްޖެއެވެ.

މި ހާދިސާއާއި ގުޅިގެން މި ބޯޓް ނިސްބަތްވާ އެއާލައިން ކަމަށްވާ ވޮއެޕާސް އިން ނެރުނު ބަޔާނެއްގައި ބުނީ، 57 ފަސިންޖަރުންނާއި 4 ކްރޫ މެމްބަރުންނާއިއެކު ޖުމްލަ 61 މީހުން ދަތުރުކުރަމުންދިޔަ, މި ފްލައިޓްގައި ތިބި އެންމެން މަރުވެފައިވާކަން ކަށަވަރުކުރެވިފައިވާ ކަމަށެވެ.

އެ ހުރިހާ ފަސިންޖަރުންނަކީ ވެސް ބްރެޒިލަށް ނިސްބަތްވާ މީހުން ކަމަށާއި، އެމީހުންގެ އަތުގައި ދެ ޤައުމަށް ނިސްބަތްވާ ޕާސްޕޯޓް  އޮތްކަން މިހާތަނަށް ކަށަވަރު ކުރެވިފައިނުވާ ކަމަށްވެސް އެ ކުންފުނިން ބުނެއެވެ.

ވެއްޓުނު ބޯޓަކީ އޭޓީއާރު މަރުކާގެ 72-500 ބޯޓެކެވެ. ފްލައިޓް ޓްރެކިން ޑޭޓާއިން ދައްކާ ގޮތުގައި މި ބޯޓުވަނީ މިނެޓެއްގެ ތެރޭގައި 17،000 ފޫޓު ތިރިއަށް ޖެހި ބިމަށް ވެއްޓިފައެވެ. މި ހާދިސާ ހިނގި ސަބަބެއް އަދި ހާމަވެފައެއް ނުވެއެވެ.

މިދިޔަ ހުކުރު ދުވަހު ހިނގާދިޔަ މިހާދިސާގެ މަންޒަރު ދައްކުވައިދޭ ވީޑިއޯއެއް މީސްމީޑިއާގައި ދައުރުވަމުން އަންނައިރު، ބޯޓު ވެއްޓި އޭގައި ނުހަނު އަވަހަށް އަލިފާން ރޯވާތަން މި ވީޑިއޯ ތަަކުން ފެނެއެވެ.

ވީޑިއޯތަކުން ބޯޓު އެންބުރެމުން ބިންމައްޗަށް ވެއްޓޭތަންފެނެއެވެ. މިހާދިސާގައި އެވަގުތު އެ ސަރަހައްދުގައި ތިބި އެއްވެސް މީހަކަށް އަނިޔާއެއް ލިބިފައިނުވާކަމަށް އެގައުމުގެ ކަމާ ބެހޭ ފަރާތްތަކުން ބުނެއެވެ.