ދަށު ކޯޓުތަކުގެ ފަނޑިޔާރުންގެ ތެރެއިން ޖުޑީޝަލް ސާވިސް ކޮމިޝަން (ޖޭއެސްސީ)އަށް އިންތިޚާބުކުރާ ފަނޑިޔާރެއްގެ ގޮތުގައި ސިވިލް ކޯޓުގެ ގާޒީ ފަރުހާދު ރަޝީދު މިއަދު އިންތިޚާބުވެއްޖެއެވެ.

މިއަދު ހެނދުނު 10:00 އިން މެންދުރު 12:00 އާ ހަމައަށް ކުރިއަށް ގެންދިޔަ މި އިންތިޚާބުގައި ވޯޓު ދިނުމުގެ ޙައްޤު ލިބިފައިވާ 166 ފަނޑިޔާރުންގެ ތެރެއިން 163 ފަނޑިޔާރުން ވޯޓު ދެއްވާފައިވެއެވެ.

އިންތިޚާބުގެ ވަގުތީ ނަތީޖާއިން ދައްކާ ގޮތުގައި، ގާޒީ ފަރުހާދު ރަޝީދަށް 91 ވޯޓު ލިބިފައިވާއިރު، އެންމެ ގާތުން ވާދަކުރެއްވި ކްރިމިނަލް ކޯޓުގެ ގާޒީ އިބްރާހީމް އިޙްސާންއަށް 71 ވޯޓު ލިބިފައިވެއެވެ.

މީގެ އިތުރުން، ފެމިލީ ކޯޓުގެ ގާޒީ އަބްދުﷲ މުޙައްމަދަށް އެއް ވޯޓު ލިބިފައިވާއިރު، އައްޑޫ ހިތަދޫ މެޖިސްޓްރޭޓް ކޯޓުގެ މެޖިސްޓްރޭޓް ރަފީއުއްދީން އަޙްމަދާއި ސިވިލް ކޯޓުގެ ގާޒީ އާއިޝަތު އަޒުފާ އަބްދުލްގަފޫރަށް އެއްވެސް ވޯޓެއް ލިބިފައެއް ނުވެއެވެ.

މި އިންތިޚާބާ ގުޅިގެން، ދަށު ކޯޓުތަކުގެ ފަނޑިޔާރުންގެ ތެރެއިން ޖޭއެސްސީގައި ތަމްސީލުކުރާނެ ފަނޑިޔާރެއްގެ ގޮތުގައި ސިވިލް ކޯޓުގެ ގާޒީ ފަރުހާދު ރަޝީދު ހޮވިފައިވާކަން ފާހަގަކުރެވެއެވެ.