މިއަދު ކަނޑުމައްޗަށް ހުއްޓުނު ލޯންޗެއްގައި ތިބި 16 މީހުން ސަލާމަތްކޮށްފިއެވެ.

މިއަދު މެންދުރުފަހުގެ ވަގުތެއްގައި ހިނގި މިހާދިސާގައި އެ ލޯންޗްގައި ތިބި 16 މީހަކު ސަލާމަތުން މާލެ ގެނެވިފައިވާކަން މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ވަނީ ވިދާޅުވެފައެވެ.

އެމްއެންޑީއެފް އިން މަޢުލޫމާތު ދެއްވިގޮތުގައި، މާލެއިން ފުރައިގެން ޅ. ނައިފަރަށް ދަތުރުކުރި ލޯންޗެއް ކ. ހިންމަފުށީގެ ހުޅަނގު އުތުރުން 9 ނޯޓިކަލް މޭލު ބޭރުގައި އިންޖީނު ހުއްޓުމާ ގުޅިގެން އެ ލޯންޗުގައި ތިބި މީހުން ސަލާމަތްކުރުމުގެ މަސައްކަތް ކުރެވުނެވެ.

Advertisement

އެމްއެންޑީއެފް މާލޭ އޭރިއާ ކޮމާންޑް ކޯސްޓްގާޑް ސެކަންޑް ސްކޮޑްރަންގެ އެހީތެރިކަމާއެކު މިއަދު މެންދުރުފަހު 13:40 ގައި އެ 16 މީހުން މާލެ ގެނެވުނު ކަމަށް އެމްއެންޑީއެފުން ހާމަކުރެއްވިއެވެ.

މި ހަފުތާގައި ރާއްޖޭގެ ބޮޑު ސަރަހައްދަކަށް ވިއްސާރަ ކުރާނެ ކަމަށް ލަފާކުރެވޭތީ، ޚާއްޞަކޮށް ކަނޑު ދަތުރުކުރާ ފަރާތްތަކުން މޫސުމަށް ސަމާލުކަން ދިނުމަށް އެމްއެންޑީއެފް އިންނާއި މޫސުމާބެހޭ ޤައުމީ އިދާރާއިން އިލްތިމާސްކުރައްވައެވެ.