ފުލުހުން އަޅާ ކޮންމެ ފިޔަވަޅަކީ ހައްގެއް ގެއްލުވާލުން ކަމަށް ދުށުމަކީ ރަނގަޅު ގޮތެއް ނޫން ކަމަށާއި، އެފަދަ ވިސްނުމަކުން ފުލުހުންނަށް އެބިއުސްވާ ކަމަށް ހޯމްލޭންޑް ސެކިއުރިޓީ މިނިސްޓަރު އަލީ އިހްސާން ރޭ ވިދާޅުވެއްޖެއެވެ.

މިނިސްޓަރު މި ވާހަކަފުޅު ދެއްކެވީ ފުލުހުންގެ 'ރައްކާ ރޯޑް ޝޯ' ފެށި ތާ 10 އަހަރު ފުރުން ފާހަގަކުރުމަށް ފުވައްމުލަކުގައި ބޭއްވުނު ޙަފްލާގައި ރޭ ވާހަކަފުޅު ދައްކަވަމުންނެވެ.

އިޙްސާން ވިދާޅުވީ ޤާނޫނު ތަންފީޒުކުރުމުގައި ދަތިތަކެއް ހުންނާނެކަން ޤަބޫލުކުރަންޖެހޭ ކަމަށެވެ. އަދި ޤާނޫނު ތަންފީޒުކުރުމުގެ މަސައްކަތަކީ މީހަކު ޤާނޫނާ ޚިލާފުވުމުން ކުރަންޖެހޭ ކަމެއްކަންވެސް ޤަބޫލުކުރަންޖެހޭ ކަމަށް ވިދާޅުވިއެވެ.

Advertisement

އޭނާ ވިދާޅުވީ ކުރީގައި ދިވެހިންގެ ވިސްނުން ހުރީ މިހާރާ ތަފާތުކޮށް ކަމަށެވެ. މިސާލަކަށް ކުއްޖެއްގެ މައްސަލަ ރަށު އޮފީހަށް ހުށަހެޅުނު ނަމަ، އޭރުގެ ބެލެނިވެރިން އެ ކުދިންނަށް އަދަބުދޭ ކަމަށް ވިދާޅުވިއެވެ. ނަމަވެސް މިހާރު އެ ވިސްނުން ބަދަލުވެ، ހާދިސާގެ ތަފްސީލަށް ނުބަލައި ބެލެނިވެރިން މައްސަލަ ހުށަހަޅަނީ ކޮމިޝަންތަކަށް ކަމަށް އޭނާ ފާހަގަކުރެއްވިއެވެ.

އިޙްސާން ވިދާޅުވީ ގިނަ ގާނޫނުތަކެއް ތަންފީޒުވަމުން އަންނައިރު ގިނަ މީހުންނަށް އުނދަގޫވާނެ ކަމަށެވެ. އެއީ މިހާތަނަށް ގިނަ ފަހަރަށް ގާނޫނުތައް ތަންފީޒުނުވެ އޮތުމުން އޭގެ ފައިދާ އާއި މަންފާ ލިބުނު ބަޔަކު ތިބެދާނެތީ ކަމަށް ވެސް ވިދާޅުވި އެވެ.