ލަންޑަންގެ ފޮރެސްޓް ގޭޓްގެ ރެސްޓޯރަންޓަކަށް ވަނުމަށް މަސައްކަތްކުރި ބަޔަކު ވަޅިން ހަމަލާދީ 4 މީހުން ޒަޚަމްކޮށްލައިފިއެވެ.

ހޮނިހިރު ދުވަހުގެ ފަތިހު ހިނގި މިހާދިސާގައި ހަމަނުޖެހުން ހިންގާފައިވަނީ ލަންޑަންގެ އިރުމަތީ ސަރަޙައްދުގައި އޮންނަ ފޮރެސްޓް ގޭޓްގެ ރޮމްފޯޑް މަގުގައި ހުންނަ "ބްރޯންޒް ރޯޔަލް އެފްރިކަން ބާ" ގައެވެ.

ފުލުހުން ބުނީ އެތަނަށް ވަނުމަށް ކަތިވަޅިއަކާއެކު ބަޔަކު މަސައްކަތްކުރަމުންދާކަމުގެ ރިޕޯޓެއް ލިބުމާ ގުޅިގެން ފުލުހުން އެ ސަރަޙައްދަށް ދިޔަކަމަށެވެ. ފުލުހުން އެ ސަރަޙައްދަށް ދިޔައިރު، ކުދިކުދި ޒަޚަމްތަކެއް ލިބިފައިވާ ތިން މީހުން ފެނުނު ކަމަށްވެސް ފުލުހުން ބުނެފައިވެއެވެ. 

Advertisement

އޭގެ ކުޑައިރުކޮޅެއްގެ ތެރޭގައި، އެ މަގާ ގުޅޭ ހިސާބުގައި އިތުރު މީހަކު ޒަޚަމްވެފައި އޮތްކަމުގެ ރިޕޯޓެއް ލިބުނުކަމަށާއި، ފުލުހުން އެ ސަރަޙައްދަށް ދިޔައިރު، ފައިގައި ވަޅިންޖަހައި ޒަޚަމްކޮށްލައިފައިވާ މީހަކު ވަނީ ހޮސްޕިޓަލަށް ގެންގޮސްފައި ކަަމަށްވެސް ފުލުހުންނާ ހަވާލަދީ ރިޕޯޓްކޮށްފައިވެއެވެ.

މި މައްސަލައާ ގުޅިގެން މިހާތަނަށް އެއްވެސް މީހަކު ހައްޔަރުކޮށްފައި ނުވާ ކަމަށާއި، މައްސަލައިގެ ތަޙުޤީޤު އަވަސް ގޮތެއްގައި ކުރިއަށްދާ ކަމަށް މެޓްރޮޕޮލިޓަން ޕޮލިސް ސަރވިސްއިން ބުނެފައިވެއެވެ. އަދި އާދިއްތަ ދުވަހުވެސް ހާދިސާ ހިނގި ސަރަޙައްދުގައި ކުށުގެ މަސްރަޙު ޤާއިމުކޮށްފައިވާ ކަމަށް ފުލުހުން މަޢުލޫމާތު ދީފައިވެއެވެ.

ލަންޑަން އެމްބިއުލަންސް ސަރވިސްއިން މި ހާދިސާއަށް އިޖާބަދިނުމަށް ތިން އުޅަނދެއް ފޮނުވާފައިވެއެވެ. އެ ސަރވިސްގެ ފަރާތުން ބުނެފައިވަނީ ތިން މީހަކަށް ފަރުވާދީފައިވާ ކަމަށާއި، އޭގެ ތެރެއިން އެކަކު ވަނީ ބޮޑެތި އަނިޔާތަކަށް ފަރުވާދޭ ހޮސްޕިޓަލަކަށް ގެންގޮސްފައި ކަމަށެވެ.