ޒުވާނުން ބާރުވެރިކުރުމަށް މި ސަރުކާރުން ދަނީ ގިނަގުނަ މަސައްކަތްތަކެއް ކުރައްވަމުން ކަމަށާ ޒުވާނުންނަކީ ގައުމުގެ އެންމެ އަގުހުރި ތަރިކަ ކަމަށް މިނިސްޓަރ އޮފް ޔޫތު އެމްޕަވަމެންޓް، އިންފޮމޭޝަން އެންޑް އާޓްސް އިބްރާހިމް ވަހީދު (އަސްވާޑް) ވިދާޅުވެއްޖެއެވެ.

ބައިނަލްއަގުވާމީގޮތުން ފާހަގަކުރާ ޒުވާނުންގެ ދުވަހު ދެއްވި ޚިތާބުގައި މިނިސްޓަރ ވިދާޅުވީ ޒުވާނުންނަކީ ގައުމުގެ އެންމެ އަގުހުރި ތަރިކަ ކަމަށާއި، ޒުވާނުން ބާރުވެރިކޮށް، ހަގީގީ މާނައިގައި ޒުވާނުންނަށް ކާމިޔާބު މުސްތަގުބަލެއް ހޯދައިދިނުމަކީ މިހާރުގެ ސަރުކާރާއި ރައީސް ޑރ.މުހައްމަދު މުއިއްޒުގެ ފާޅުކަން ބޮޑު ސިޔާސަތެއް ކަމަށެވެ.

މިނިސްޓަރުގެ ޚިތާބުގައި ފާހަގަކުރެއްވި ގޮތުގައި، ޒުވާނުންނާ ބެހޭ ގައުމީ ސިޔާސަތެއް އެކުލަވާލުމުގެ މަސައްކަތް ދަނީ ކުރެވެމުންނެވެ. މި ސިޔާސަތު އެކުލަވާލުމުގައި ދިވެހި އެންމެހާ ޒުވާނުންނާ މަޝްވަރާކުރެވޭނެ ކަމަށާއި، އެއްވެސް ޒުވާނެއް ބާކީ ނުވާނެ ކަމުގެ ޔަގީންކަން އެމަނިކުފާނު ދެއްވިއެވެ.

މިނިސްޓަރުގެ ޚިތާބުގައި އިތުރަށް ވިދާޅުވީ ފަންނިއްޔާތުގެ ދާއިރާއިން ޒުވާނުން ކުރިއެރުވުމަށް ސަރުކާރުން ނުހަނު އިސްކަމެއް ދޭ ކަމަށެވެ. މިގޮތުން، މިއަހަރު ތެރޭގައި ވެސް ތަފާތު އެތަކެއް ޕްރޮގްރާމެއް ހިންގިފައިވާ ކަމަށް އެމަނިކުފާނު ފާހަގަކުރެއްވިއެވެ.

ވަޒީފާގެ ފުރުސަތުތަކާ ގުޅޭގޮތުން ވާހަކަދައްކަވަމުން، މިނިސްޓަރ ވިދާޅުވީ ވަޒީފާއެއް އަދާކުރަން ބޭނުންވާ ކޮންމެ ދިވެހި ޒުވާނަކަށް، އެ ޒުވާނެއްގެ ތަޢުލީމާއި ތަޖުރިބާ އަދި ހުނަރާ އެކަށޭނަ، ރަނގަޅު އާމްދަނީއެއް ލިބޭ ވަޒީފާއެއް 5 އަހަރުގެ ތެރޭގައި ހޯދައިދިނުމަށް ސަރުކާރުން މަސައްކަތްކުރަމުންދާ ކަމަށެވެ.

މީގެ އިތުރުން، ނެޝަނަލް އެޕްރެންޓިސްޝިޕް ޕްރޮގްރާމް ކުރިއަށް ގެންދެވޭ ކަމަށާއި، މިހާރު 180 ޒުވާނުން މި ޕްރޮގްރާމް ފުރިހަމަކޮށް ޒިންމާދާރު ވަޒީފާތައް އަދާކުރަމުންދާއިރު، އިތުރު 60 ޒުވާނުން ދަނީ ޕްރޮގްރާމް ފުރިހަމަކުރަމުން ކަމަށް މިނިސްޓަރގެ ޚިޠާބުގައި ހާމަކުރެއްވިއެވެ.

ނިންމާލަމުން މިނިސްޓަރ ޒުވާނުންނަށް އިލްތިމާސްކުރެއްވީ އާ އަޒުމަކާއެކު ހީވާގިކަމާއި މުރާލިކަމާއެކު، ސާފު އަމާޒެއް ކަނޑައަޅައި އެ އަމާޒު ހާސިލްކޮށް، ތިމާ ދެކޭ މުސްތަގުބަލުގެ ހުވަފެންތަކުގައި ކުލަޖެއްސުމަށެވެ.