ޓްރަމްޕް ހެރިސްގެ ކެމްޕޭން ފޮޓޯއަކާމެދު ދޮގު ތުހުމަތެއް ކުރައްވައިފިކަމަށް މީޑިއާ ރިޕޯޓްތައް ބުނެފިއެވެ.
ކުރީގެ އެމެރިކާގެ ރައީސް ޑޮނަލްޑް ޓްރަމްޕް ވަނީ ވައިސް ޕްރެޒިޑެންޓް ކަމަލާ ހެރިސްގެ ކެމްޕޭން އިން ޑިޓްރޯއިޓްގައި ބޭއްވި ރެލީއެއްގެ ފޮޓޯއެއް އާޓިފިޝަލް އިންޓެލިޖެންސް (އޭއައި) ބޭނުންކޮށްގެން ހަދާފައިވާ ކަމަށް ތުހުމަތު ކުރައްވާފައެވެ.
އޯގަސްޓް 7 ވަނަ ދުވަހު ޑިޓްރޯއިޓްގައި ބޭއްވުނު ރެލީގެ ފޮޓޯއަކާ ގުޅޭގޮތުން ޓްރަމްޕް ވިދާޅުވެފައިވަނީ އެއީ އޭއައި ބޭނުންކޮށްގެން ހަދާފައިވާ ފޮޓޯއެއް ކަމަށާއި އަދި އެ ރެލީގައި އެވަރުގެ ބަޔަކު ބައިވެރިވެފައި ނުވާ ކަމަށެވެ.
ނަމަވެސް، އެ ރެލީގެ ވީޑިއޯތަކުން ދައްކާގޮތުން ގިނަ އަދަދެއްގެ މީހުން ރެލީގައި ބައިވެރިވެފައިވާކަން އެނގެއެވެ. އަދި ރޯއިޓަރސް އާއި ގެޓީ އިމޭޖަސް ފަދަ ނޫސް އޭޖެންސީތަކުންވެސް އެ ރެލީގެ ފޮޓޯތައް ނަގާފައިވެއެވެ.
ޓްރަމްޕްގެ ތުހުމަތާ ގުޅިގެން ކެލިފޯނިއާ ޔުނިވަރސިޓީގެ ޕްރޮފެސަރ ހާނީ ފަރިދް ވިދާޅުވެފައިވަނީ އެ ފޮޓޯ ދިރާސާކުރުމަށްފަހު އޭއައި ބޭނުންކޮށްގެން ހަދާފައިވާ ކަމުގެ އެއްވެސް ހެއްކެއް ނުފެންނަ ކަމަށެވެ.
މި މައްސަލައާ ގުޅޭގޮތުން ހެރިސްގެ ކެމްޕޭނުން އަދި އެއްވެސް ބަޔާނެއް ނެރެފައެއް ނުވެއެވެ.
Advertisement
This content is created and paid for by advertisers and does not involve Voice Journalists
