90 ޕަސެންޓަކީ މުސްލިމުން ދިރިއުޅޭގައުމެއްކަމަށްވާ ތަޖިކިސްތާނުގައި ބުރުގާއެޅުން މަނާކޮށްފިއެވެ.

ތަޖިކިސްތާނުން މިފަދަ އަމުރެއް ނެރެފައިވަނީ ނިމިދިޔަ ޖުލައި މަހުގެ ތެރޭގައި އެގައުމުގެ ގާނޫނު ހަދާ މަޖިލީހުންނެވެ.

އެގޮތަށް މަޖިލީހުން ފާސްކުރީ "ގައުމީ ސަގާފީ އުސޫލުތައް ރައްކާތެރިކޮށް، ޚުރާފާތާއި ހަރުކަށި ފިކުރުތަކާ ދެކޮޅަށް މަސައްކަތްކުރުން" ކަމަށް ބުނެއެވެ.

މިކަމާއި ގުޅޭ ގޮތުން ބޭރުގެ މީޑިއާއަށް މައުލޫމާތު ދެމުން ތަޖިކިސްތާނުގެ އަންހެނަކު ވަނީ ގާތްގަނޑަކަށް ކޮންމެ އަހަރަކު ވެސް އެ ގައުމުގެ ސަރުކާރުން ހިޖާބާ ގުޅޭ ބިލްތައް ތައާރަފް ކުރަމުން އަންނަކަން ފާހަގަކޮށްފައެވެ. އެގޮތުން ހިޖާބު އަޅައިގެން އުޅެވޭނެ ތަންތަނާއި، އަޅަންވީ މިންވަރު ވެސް ހާމަކޮށް ބިލްތައް ފާސްކޮފައިވާ ކަމަށް އޭނާ ބުނެފައިވެއެވެ.

މީގެ އިތުރުން، ބުރުގާ އެޅުން މަނާ ކުރިތާ މަހެއް ފަހުން އެގައުމުން ވަނީ ކަޅު ހެދުން އެޅުން ވެސް އަންހެނުންނަށް މަނާކޮށްފަ އެވެ.

ތަޖިކިސްތާނަކީ އިސްލާމްދީނަށް އުޅެ ދީނީ އަޅުކަންތައް އަދާކުރުމުގެ ހައްގުތައް ހަނިކުރުމުގެ ތާރީހެއް އޮތް ގައުމެކެވެ. އެގޮތުން، މީގެ ކުރިން 2007 ވަނަ އަހަރުން ފެށިގެން ސްކޫލްތަކުގައި ހިޖާބު މަނާކޮށްފައިވާއިރު، 2009 ވަނަ އަހަރުން ފެށިގެން އާންމު މުއައްސަސާތަކުގައި ހިޖާބު މަނާކޮށްފައިވެއެވެ.

މީގެ އިތުރުން، ޒުވާނުންނަށް މިސްކިތްތަކަށް ދިއުން މަނާކުރުމާއި، ޔުނިވާސިޓީތަކުގައި އަންހެނުން ހިޖާބު އެޅުން މަނާކުރުމާއި، ތުނބުޅި ހުރި ފިރިހެނުން ހުއްޓުވައި ފުލުހުން ސުވާލު ކުރުމާއި، އިސްލާމީ ހެދުން ވިއްކުންވެސް އެގައުމުން މަނާކޮށްފައިވެއެވެ.