މާލެއަށް ކުރަމުންދާ ވިއްސާރައިގެ ސަބަބުން ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން ދެމުންދާ ކުނީގެ ޚިދުމަތަށް ބުރޫ ނާރާނެހެން އެންމެން ގުޅިގެން މަސައްކަތް ކުރުމަށާއި މަގުމައްޗަށް ކުނި ނުނެރުމަށް އެ ކުންފުނިން އިލްތިމާސްކޮށްފިއެވެ.
ސޯޝަލް މީޑިއާގައި ވެމްކޯއިން ކޮށްފައިވާ ޕޯސްޓެއްގައި ބުނެފައިވަނީ ވެމްކޯއިން ކުނި ނެގުމަށް ގޭގެއަށް ދާ މުވައްޒަފުންނަށް ފަސޭހައިން ކުނި ނެގޭނެ ގޮތަށް ބެހެއްޓުމަށާއި މަގުމައްޗަށް ކުނި ނުނެރެ ބެހެއްޓުމަށެވެ. އަދި އެއްވެސް ގޭބިސީއަކުން ކުނި ނުގެންދެވިހުރިކަމުގައިވިޔަސް މަގުމައްޗަށް ކުނި ނެރުމުގެ ބަދަލުގައި ވެމްކޯގެ ހޮޓްލައިން 1666 އަށް ގުޅުއްވައިގެން އެމައްސަލައެއް ހައްލުކުރުމަށް އެދިފައިވެއެވެ.
މީގެ އިތުރުން ޓްރާންސްފަރ ސްޓޭޝަންތަކުން ޚިދުމަތް ހޯއްދަވާއިރު އެންމެހާ ފަރާތްތަކުގެ ސަލާމަތާއި ރައްކާތެރިކަން ކަށަވަރުކުރުމަށް ވެމްކޯގެ މުވައްޒަފުންގެ އިރުޝާދުތަކަށް ސަމާލުވުމަށްވެސް އެ ކުންފުނީގެ ޕޯސްޓުގައި އެދިފައިވެއެވެ.
މުޅި ރާއްޖެއަށް ކުރަމުންދާ ވިއްސާރައިގައި މާލޭސިޓީއަށްވެސް ދަނީ ބޯކޮށް ވާރޭ ވެހެމުންނެވެ. މާލޭގެ ގިނަ މަގުތަކުގައި ފެން ބޮޑުވެފައިވާއިރު މަގުމައްޗަށް ކުނި ނެރެފައި ބަހައްޓާނަމަ ވާރޭއާއެކު މަގުތަކަށް ކުނިތައް ފެތުރި، މަގުތައް ތަޣައްޔަރުވެ، ބަލިތައް ފެތުރުމުގެ ފުރުސަތު އޮންނާނެއެވެ.
މާލޭގެ އެކި ސަރަހައްދުތަކުގައި ބޮޑުވެފައިވާ ފެން ހިންދުމުގެ މަސައްކަތް ސަރުކާރު ހިއްސާވާ ކުންފުނިތަކާއި މިނިސްޓްރީތަކާއި މާލޭސިޓީ ކައުންސިލްގެ މެންބަރުން ގުޅިގެން ދަނީ ކުރަމުންނެވެ. އަދި މި މަސައްކަތުގައި މޯލްޑިވްސް ޕޮލިސް ސަރވިސްއާއި އެމްއެންޑީއެފްގެ އިތުރުން ރައްޔިތުންގެ މަޖިލީހުގެ މެންބަރުންވެސް ހަރަކާތްތެރިވަމުންދެއެވެ.
Advertisement
This content is created and paid for by advertisers and does not involve Voice Journalists
