މިހާރު ރާއްޖެއަށް ކުރަމުންދާ ވިއްސާރައާ ގުޅިގެން މާދަމާ އަކީ ސަރުކާރު ބަންދު ދުވަހެއް ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވައިފިއެވެ.
ރައީސް އޮފީހުގެ ތަރުޖަމާން ހީނާ ވަލީދު ކުރެއްވި ޓްވީޓެއްގައި ވިދާޅުވެފައިވަނީ، މާދަމާ (14 އޮގަސްޓް ވާ ބުދަ ދުވަސް) އަކީ ސަރުކާރު ބަންދު ދުވަހެއްގެ ގޮތުގައި ރައީސް ހަމަޖައްސަވާފައިވާ ކަމަށެވެ.
މި ނިންމެވުމަކީ ރާއްޖޭގެ ގިނަ ރަށްތަކަށް ބޯކޮށް ވާރޭވެހި، މޫސުން ގޯސްވުމުގެ ސަބަބުން ކިޔަވާ ކުދިންނާއި ވަޒީފާ އަދާކުރާ ފަރާތްތަކަށް ދަތުރުފަތުރު ކުރުމާއި ހިނގާބިނގާވެ އުޅުމަށް ދިމާވެފައިވާ ދަތިތަކަށް ލުޔެއް ދިނުމުގެ ގޮތުން ނިންމެވި ނިންމެވުމެއް ކަމަށް ހީނާ ވިދާޅުވިއެވެ.
މީގެ އިތުރުން، މިހާރު ކުރަމުންދާ ވިއްސާރައިގައި ގޯތިގެދޮރަށާއި ޢާއިލާތަކަށް ލިބޭ ގެއްލުން ކުޑަކުރުމަށާއި، ރައްޔިތުންނަށް އެހީތެރިކަން ފޯރުކޮށްދިނުމަށް ސަރުކާރުން ޚާއްޞަ އިސްކަމެއް ދީގެން ރޭގަނޑާއި ދުވާލު މަސައްކަތް ކުރަމުން ގެންދާނެ ކަމުގެ ޔަޤީންކަން ރައީސް ދިވެހި ރައްޔިތުންނަށް ދެއްވާފައިވާ ކަމަށްވެސް ހީނާ ވިދާޅުވިއެވެ.
މި ނިންމެވުމާ ގުޅިގެން، މާދަމާ އަކީ ސަރުކާރުގެ އޮފީސްތަކާއި މުއައްސަސާތައް ބަންދު ދުވަހަކަށް ވާނެއެވެ. ނަމަވެސް، އާންމު ޚިދުމަތްތައް ދޭ ތަންތަނާއި ކުއްލި ޙާލަތްތަކުގައި މަސައްކަތްކުރާ މުވައްޒަފުން އާދައިގެ މަތިން މަސައްކަތް ކުރައްވާނެ ކަމަށް ބެލެވެއެވެ.
Advertisement
This content is created and paid for by advertisers and does not involve Voice Journalists
