ރާއްޖެއަށް މިވަގުތު ކުރަމުންދާ ބޯ ވިއްސާރައިގެ ސަބަބުން މާލޭގެ ގިނަ ގެތަކަކަށް ފެންވަދެ، އެކަމާ ގުޅިގެން ސިފައިން ހަރަކާތްތެރިވަމުންދާ ކަމަށް އެމްއެންޑީއެފްއިން މަޢުލޫމާތު ދީފިއެވެ.

އެމްއެންޑީއެފްއިން އެކްސްގައި ޝާއިޢުކުރި ޕޯސްޓެއްގައި ބުނެފައިވާ ގޮތުގައި، މިހާތަނަށް 183 ގެއަކަށް ފެންވަދެފައިވާކަން ރިޕޯޓުކޮށްފައިވެއެވެ. މި މައްސަލައާ ގުޅިގެން އެހީތެރިކަން ފޯރުކޮށްދިނުމަށް އެމްއެންޑީއެފް މާލޭ އޭރިއާ ކޮމާންޑުން ވަނީ އެހެނިހެން އިދާރާތަކާ ގުޅިގެން މަސައްކަތް ފަށާފައެވެ.

ފެންވަންނަ ގެތަކުގައި ވެލި ބަސްތާ ޖެހުމުގެ މަސައްކަތް ސިފައިންވަނީ ފަށާފައެވެ. މިގޮތުން މިހާތަނަށް 48 ގެއެއްގައި ޖުމްލަ 136 ވެލި ބަސްތާ ޖަހައިދީފައިވާ ކަމަށް އެމްއެންޑީއެފްއިން ހާމަކޮށްފައިވެއެވެ.

Advertisement

މިއަދު މެންދުރު ފަހުން ފެށިގެން މާލެއަށް ބޯކޮށް ވާރޭވެހި، މަގުތަކުގައި ފެންބޮޑުވެފައިވާތީ ހިނގާބިނގާވެ އުޅުމާއި އުޅަނދުފަހަރު ދުއްވުމަށް ވަނީ ދަތިވެފައެވެ. މަގުތަކުން ފެން ހިންދުމުގެ މަސައްކަތާއި އާންމުންނަށް އެހީތެރިވުމުގެ މަސައްކަތުގައި ސިފައިން ދަނީ ހަރަކާތްތެރިވަމުންނެވެ. އަދި މަގުތަކުގައި ހެދިފައިވާ ފެންގަނޑު ހިނދެންދެން މާލޭގައި ބަރު އުޅަނދުފަހަރު ނުދުއްވުމަށް ވެސް ވަނީ އަންގާފައެވެ.