ރާއްޖެއިން ބޭރަށް ފުރާ އެންމެހައި ފަރާތްތަކުން ޓްރެވެލް ޑިކްލަރޭޝަން ފޯމް ފުރިހަމަކުރަން ނުޖެހޭގޮތަށް މޯލްޑިވްސް އިމިގްރޭޝަނުން ނިންމައިފިއެވެ. މި ނިންމުން ތަންފީޒުކުރަން ފަށާނީ މިމަހުގެ 15 ވަނަ ދުވަހުން ފެށިގެންނެވެ.

މޯލްޑިވްސް އިމިގްރޭޝަނުން ނެރުނު ނޫސްބަޔާނެއްގައި ބުނެފައިވާ ގޮތުގައި، މި ނިންމުމަކީ އިމިގްރޭޝަން ކޮންޓްރޯލަރ މުޙައްމަދު ޝަމްޢާން ވަޙީދު ނިންމެވި ނިންމުމެކެވެ. މި ނިންމުމުގެ މަޤްޞަދަކީ ރާއްޖެއިން ފުރާ އެންމެހައި ފަރާތްތަކަށް ދަތުރުފަތުރު ކުރުމުގައި ލުއިފަސޭހަ އިންތިޒާމުތަކެއް ހަމަޖެއްސުމެވެ.

މިދިޔަ އަހަރުގެ ނޮވެންބަރު 30 ވަނަ ދުވަހުން ފެށިގެން ރާއްޖެއިން ބޭރަށް ފުރާ ދިވެހިން ޓްރެވެލް ޑިކްލަރޭޝަން ފުރަން ނުޖެހޭގޮތަށް ވަނީ ނިންމާފައެވެ. އަދި މިހާރު މިމަހުގެ 15 ވަނަ ދުވަހުން ފެށިގެން ރާއްޖެއިން ބޭރަށްދާ އެއްވެސް ފަރާތަކުން މި ފޯމް ފުރިހަމަކުރާކަށް ނުޖެހޭނެއެވެ.

ނަމަވެސް، ރާއްޖެއަށް ޒިޔާރަތްކުރާ ބިދޭސީން ކުރިއެކޭ އެއްފަދައިން ރާއްޖެއަށް އައުމުގެ 96 ގަޑިއިރު ކުރިން "ޓްރެވެލް ޑިކްލަރޭޝަން" ފުރިހަމަކުރަންޖެހޭނެކަން އިމިގްރޭޝަނުން ވަނީ ފާހަގަކޮށްފައެވެ.

މި ބަދަލާއެކު، ރާއްޖެއިން ބޭރަށް ދަތުރުކުރާ ފަރާތްތަކަށް ދަތުރުފަތުރުގެ އިޖުރާއަތުތައް ފަސޭހަވެގެންދާނެކަމަށް ބެލެވެއެވެ.