ޓެންސަރ ޗިޕް ހިމެނޭ ފުރަތަމަ އިއާބަޑްސްގެ ގޮތުގައި ގޫގުލްގެ ޕިކްސެލް ބަޑްސް ޕްރޯ 2 ތަޢާރަފުކޮށްފިއެވެ. 

2022 ވަނަ އަހަރު ނެރުނު ފުރަތަމަ ޖީލުގެ ޕިކްސެލް ބަޑްސް ޕްރޯއާ އަޅާބަލާއިރު، މި އައު މޮޑެލް ވަނީ އެތެރެއާއި ބޭރު ވެސް އަލުން ފަރުމާކޮށްފައެވެ. ގޫގުލްއިން ބުނާ ގޮތުގައި 45 މިލިއަނަށްވުރެ ގިނަ ކަންފަތުގެ ސްކޭން ޑޭޓާ ބޭނުންކޮށްގެން ވަނީ އޭގެ ބޭރުގެ ބައި އަލުން ފަރުމާކޮށްފައެވެ. މިގޮތުން، މި އައު މޮޑެލް ވަނީ ކުރީގެ މޮޑެލްއަށްވުރެ 27 އިންސައްތަ ކުޑަކޮށް، 1.5 ގްރާމް ލުއިކޮށްފައެވެ.

ޕިކްސެލް ބަޑްސް ޕްރޯ 2ގައި ހިމެނޭ ޓެންސަރ އޭ1 ޗިޕްގެ ސަބަބުން އޯޑިއޯ ޕްރޮސެސްކުރުމާއި ގޫގުލްގެ އާޓިފިޝަލް އިންޓެލިޖެންސް ބޭނުންކުރެވޭނެ ކަމަށް ގޫގުލްއިން ބުނެއެވެ. މި ޗިޕްގެ ސަބަބުން އަޑުގެ ބާރުމިނަށްވުރެ 90 ގުނަ އަވަހަށް އޯޑިއޯ ޕްރޮސެސް ކުރެވޭނެ ކަމަށް ބުނެފައިވެއެވެ. އަދި ކުރީގެ މޮޑެލްއަށްވުރެ ދެ ގުނަ ގިނައިން ބޭރުގެ އަޑުތައް ބްލޮކްކުރެވޭނެ ކަމަށް ވެސް ބުނެފައިވެއެވެ.

އަޑުގެ ފެންވަރު ރަނގަޅުކުރުމަށް 11 މިލިމީޓަރުގެ ޑްރައިވަރެއް ބޭނުންކޮށްފައިވާ ކަމަށް ގޫގުލްއިން ބުނެއެވެ. މީގެ އިތުރުން ޕިކްސެލް ޓެބްލެޓް ނުވަތަ ޕިކްސެލް 6 އަދި އޭގެ ފަހުގެ ފޯނުތަކާއެކު ބޭނުންކުރާނަމަ ސްޕޭޝަލް އޯޑިއޯއާއި ހެޑް ޓްރެކިންގ ފީޗަރ ވެސް ލިބޭނެއެވެ.

އިތުރު ފީޗަރތަކުގެ ތެރޭގައި ފައިންޑް މައި ޑިވައިސަސް ނެޓްވޯކާ ގުޅޭގޮތަށް ހަދާފައިވުމާއި، އެހެން ޕިކްސެލް ސާމާނުތަކާއެކު އޮޓޮމެޓިކުން ސްވިޗްވުމާއި، ބްލޫޓޫތު އެލްއީ އޯޑިއޯ ހިމެނެއެވެ.

މީގެ ބެޓަރީ ދެމިހުންނާނެ ކަމަށް ގޫގުލްއިން ބުނަނީ ނޮއިޒް ކެންސެލޭޝަން އޮންކޮށްގެން ނަމަ 8 ގަޑިއިރު ކަމަށެވެ. އަދި (އޮފްކޮށްގެން 12 ގަޑިއިރު) ކަމަށެވެ. މިއީ ކުރީގެ މޮޑެލްއަށްވުރެ 1 ގަޑިއިރު އިތުރުވުމެކެވެ.

ޕިކްސެލް ބަޑްސް ޕްރޯ 2 ލިބެން ހުންނާނީ ޕޯސެލެއިން (ޓެން)، ހޭޒަލް (ގްރޭ)، ވިންޓަރގްރީން (ގްރީން) އަދި ޕިއޯނީ (ޕިންކް) ކުލަތަކުގައި 229 ޑޮލަރަށެވެ. މިއީ ކުރީގެ މޮޑެލްއަށްވުރެ 29 ޑޮލަރު ބޮޑު އަގެކެވެ.