ރާއްޖެއަށް މިހާރު ކުރަމުންދާ ވިއްސާރައިގެ ސަބަބުން ޢާންމު ރައްޔިތުންގެ ދިރިއުޅުމަށް ކުރިމަތިވަމުންދާ ދަތިތަކަށް އަވަސް ޙައްލެއް ހޯދުމަށްޓަކައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޚާއްޞަ ޓާސްކް ފޯހެއް އުފައްދަވައިފިއެވެ.

ޗީފް ސްޕޯކްސް ޕާސަން ހީނާވަލީދު ދާދިދެންމެ އެކްސްގައި ކުރެއްވި ޕޯސްޓެއްގައި ވިދާޅުވީ މި ޓާސްކް ފޯހުގެ މަސްއޫލިއްޔަތަކީ ވިއްސާރައާ ގުޅިގެން ކުރިމަތިވަމުންދާ ކަންކަން މޮނިޓަރކޮށް، ރައްޔިތުންނަށް ދިމާވާ މައްސަލަތަކަށް އަވަސް ޙައްލު ހޯދައިދިނުމެވެ. ޓާސްކް ފޯހުގެ ޗެއަރމަނަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ.

https://twitter.com/MvSpokesperson/status/1823412515029836022

މި ޓާސްކް ފޯހުގައި ހިމެނިވަޑައިގަންނަވަނީ ސަރުކާރުގެ އިސް 9 ބޭފުޅުންނެވެ. އޭގެ ތެރޭގައި ހިމެނެނީ މިނިސްޓަރ އޮފް ޑިފެންސް މުޙައްމަދު ޣައްސާން މައުމޫން، މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީ ޢަލީ އިޙްސާން، މިނިސްޓަރ އޮފް އެޑިޔުކޭޝަން ޑރ. އިސްމާޢީލް ޝަފީޢު، މިނިސްޓަރ އޮފް ހެލްތް ޑރ. ޢަބްދުﷲ ޚަލީލު، މިނިސްޓަރ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީ ޠާރިޤް އިބްރާހީމް، އަދި މިނިސްޓަރ އޮފް ސިޓީސް، ލޯކަލް ގަވަރންމަންޓް އެންޑް ޕަބްލިކް ވާރކްސް އާދަމް ޝަރީފް ޢުމަރެވެ.

މީގެ އިތުރުން ޓާސްކް ފޯހުގައި ހިމެނިވަޑައިގަންނަވަނީ ޗީފް އޮފް ސްޓާފް ޢަބްދުﷲ ފަޔާޟް، ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާހީމް ޙިލްމީ އަދި ކޮމިޝަނަރ އޮފް ޕޮލިސް އަލީ ޝުޖާއުއެވެ.

މި ޓާސްކް ފޯސް އުފެއްދެވުމާއެކު، ވިއްސާރައިގެ ސަބަބުން ރައްޔިތުންނަށް ކުރިމަތިވާ ދަތިތަކަށް އަވަސް ޙައްލު ލިބި، އެކަމާ ގުޅޭ މަސައްކަތްތައް ހަލުވިވެގެންދާނެ ކަމަށް އުންމީދު ކުރެވެއެވެ.