އޮސްޓްރޭލިއާގެ އެންމެ ބޮޑެތި ރަން މައުދަންތައް ކޮނުމުގެ ކުންފުނިތަކުގެ ތެރެއިން އެއް ކުންފުނިކަމަށްވާ އިވޮލިއުޝަން މައިނިންގ ލިމިޓެޑް އަށް ބޮޑު ރޭންސަމްވެއަރ ހަމަލާއެއް ދީފައިވާ ކަމަށް އެ ކުންފުނިން އިއުތިރާފުވެއްޖެއެވެ.
އިވޮލިއުޝަން މައިނިންގއިން ބުނާ ގޮތުގައި މި ހަމަލާ އެންމެ ފުރަތަމަ ފާހަގަކުރެވިފައިވަނީ 2024 ވަނަ އަހަރުގެ އޯގަސްޓް 8 ވަނަ ދުވަހުއެވެ. މި ހަމަލާ ފާހަގަކުރެވުމާ ގުޅިގެން ބޭރުގެ ފޮރެންސިކް މާހިރުން ގެނެސް، މައްސަލަ ތަހުގީގުކުރަން ފަށާފައިވާ ކަމަށް އެ ކުންފުނިން ބުނެފައިވެއެވެ. އަދި އޯގަސްޓް 12 ވަނަ ދުވަހު މި މައްސަލައާ ގުޅޭ ގޮތުން ނެރުނު ނޫސް ބަޔާނުގައި ބުނެފައިވަނީ މި ހަމަލާ މިހާރު ވަނީ ފުރިހަމައަށް ކޮންޓްރޯލްކުރެވިފައި ކަމަށެވެ.
ކުންފުނީގެ މަސައްކަތްތަކަށް އެއްވެސް ބޮޑު އަސަރެއް ކޮށްފައިނުވާ ކަމަށް ބުނެފައިވާ ނަމަވެސް، ހަމަލާ ދިން ފަރާތުން އެއްވެސް މުހިންމު މަޢުލޫމާތެއް ވަގަށް ނަގާފައިވޭތޯ އަދި ސާފުވެފައެއް ނުވެއެވެ. ކުންފުނިން ބުނެފައިވަނީ މި ހަމަލާއާ ގުޅޭ ގޮތުން އޮސްޓްރޭލިއާގެ ސައިބަރ ސެކިއުރިޓީ ސެންޓަރަށް ރިޕޯޓުކޮށްފައިވާ ކަމަށެވެ. ނަމަވެސް މިހާތަނަށް އެއްވެސް ރޭންސަމްވެއަރ ގްރޫޕަކުން މި ހަމަލާގެ ޒިންމާ ނަގާފައެއް ނުވެއެވެ.
އިވޮލިއުޝަން މައިނިންގ އަކީ އޮސްޓްރޭލިއާއާއި ކެނެޑާގައި ގިނަ ރަން މައުދަންތަކެއް ހިންގާ ކުންފުންޏެކެވެ. 2011 ވަނަ އަހަރު އުފެއްދި މި ކުންފުންޏަކީ މިހާރު ދުނިޔޭގެ އެންމެ ބޮޑެތި ރަން އުފައްދާ ކުންފުނިތަކުގެ ތެރޭގައި ހިމެނޭ ކުންފުންޏެކެވެ. މި ކުންފުނީގެ ރަން މައުދަންތަކުގައި 280،000 ކިލޯގްރާމަށް ވުރެ ގިނަ ރަން ހުރި ކަމަށް ބެލެވެއެވެ.
މި ހަމަލާގެ ކުރިން، 2024 ވަނަ އަހަރުގެ ޖޫން މަހު އޮސްޓްރޭލިއާގެ އަނެއް ބޮޑު މައުދަންތައް ކޮނުމުގެ ކުންފުންޏެއް ކަމަށްވާ ނޯދަން މިނެރަލްސްއަށް ވެސް ވަނީ ސައިބަރ ހަމަލާއެއް ދީފައެވެ. އެ ހަމަލާ ދިނީ ޗައިނާގެ ބިއަންލިއަން ނަމަކަށް ކިޔާ ހެކަރުންގެ ގްރޫޕަކުންނެވެ.
Advertisement
This content is created and paid for by advertisers and does not involve Voice Journalists
