ބަންގްލަދޭޝްގެ ދާޚިލީ ހަމަނުޖެހުންތަކުގައި ފުލުހުން މީހަކު މަރާލި މައްސަލާގައި ބަންގްލަދޭޝްގެ ކުރީގެ ބޮޑުވަޒީރު ޝެއިޚް ހަސީނާއާ ދެކޮޅަށް މަރުގެ ތަހުގީގެއް ފަށައިފިއެވެ.
މި މައްސަލަ ހުށަހެޅީ ވިޔަފާރިވެރިއެއް ކަމަށްވާ އާމިރު ހަމްޒާއެވެ. މައްސަލަ ހުށަހެޅީ ޖުލައި މަހު، މަގުމަތިން ދަނިކޮށް ބޮލަށް ބަޑި ޖަހައި މަރާލި، ފިހާރައެއްގެ ވެރިޔާ އަބޫ ސައީދާގެ މަރުގެ މައްސަލައާއި ގުޅިގެންނެވެ.
އަދި މީގެއިތުރުން، ޖުލައި މަހުގެ 19 ވަނަ ދުވަހު ދަރިވަރުން ސުލްހަވެރި އިހުތިޖާޖެއް ކުރަމުން ދަނިކޮށް ފުލުހުން އެއްވެ ތިބި މީހުންނާ ދިމާލަށް ބަޑި ޖަހާފައިވާ ކަމަށް ތުހުމަތުކުރެވޭކަމަށް ވެސް އޭނާ ބުނެފައިވެއެވެ.
ހަސީނާއާ ދެކޮޅަށް މައްސަލަ ހުށަހެޅި މީހާގެ ވަކީލު، މަމޫން މިޔާ ވިދާޅުވީ ޑާކާގެ ކޯޓަކުން ވަނީ ތުހުމަތު ކުރެވޭ ފަރާތްތަކާ ދެކޮޅަށް ހުށަހެޅި މަރުގެ އެ މައްސަލަ ބަލައިގަތުމަށް ނިންމާފައިވާ ކަމަށެވެ.
ވެރިރަށް ޑާކާގައި ހަފުތާތަކެއް ވަންދެން ހިނގި ނުރައްކާތެރި ހަމަނުޖެހުންތަކާ ގުޅިގެން ކުރީގެ ސަރުކާރުގެ އިސް ހަ ބޭފުޅެއްގެ މައްސަލަ ވެސް ބަލަމުން ދާކަމަށް ބަންގްލަދޭޝްގެ މީޑީއާތަކުން ރިޕޯޓުކުރެއެވެ.
ހަސީނާ އިސްތިއުފާ ދެއްވާފައިވަނީ މިދިޔަ ހަފްތާގައެވެ. އިސްތިއުފާ ދެއްވުމަށްފަހު އިންޑިއާއަށް ހަސީނާ ވަނީ ފިއްލަވައިފައެވެ.
އެއަށްފަހު، އެކަމަނާއާ ދެކޮޅަށް މުޒާހަރާ ކުރި މީހުންނާ ދެކޮޅަށް ތަހުގީގެއް ހިންގުމަށް ވަނީ ހަސީނާ ގޮވާލައްވާފައެވެ.
ބަންގްލަދޭޝްގައި ހަފްތާތަކެއް ވަންދެން ކުރިއަށްދިޔަ ދަރިވަރުންގެ މުޒާހަރާތަކުގައި 400 އަށްވުރެ ގިނަ މީހުން މަރުވެފައިވެއެވެ. އޭގެ ތެރެއިން ގިނަ މީހުން މަރުވެފައިވަނީ ފުލުހުންގެ ވަޒަނުންނެވެ.
Advertisement
This content is created and paid for by advertisers and does not involve Voice Journalists
