ރަޝިޔާގެ ކުރުސްކް ސަރަޙައްދުގައި މިވަގުތު ނުރައްކާތެރި ޙާލަތެއް އޮތުމާ ގުޅިގެން، އެ ސަރަޙައްދުގައި ދިރިއުޅެމުންދާ ދިވެހީން ރައްކާތެރިކަމާއި ސަލާމަތްތެރިކަމަށް ޚާއްސަ އަހަންމިއްޔަތުކަމެއް ދެއްވުމަށް ދިވެހި ޚާރިޖިއްޔާއިން އިލްތިމާސްކުރައްވައިފިއެވެ.

ޚާރިޖީ ވުޒާރާއިން ނެރުއްވި ބަޔާނެއްގައި ވިދާޅުވެފައިވަނީ، މިހާރު ހިނގަމުންދާ ރަޝިޔާ-ޔޫކްރެއިން ހަނގުރާމައިގައި ދިވެހި ދަރިވަރުން ތިބި ސަރަޙައްދެއްކަމަށްވާ ކުރުސްކް މިވަގުތު އޮތީ ނުރައްކާތެރި ޙާލަތެއްގައި ކަމަށެވެ.

މި ބަޔާނުގައި އިތުރަށް ބަޔާންކޮށްފައިވަނީ، ދިވެހި ޚާރިޖީ ވުޒާރާއާއި ރަޝިޔާގައި ހުންނަ ދިވެހިރާއްޖޭގެ އެމްބަސީން ދަނީ ކުރުސްކް ސަރަޙައްދުގައި ތިބި ދިވެހި ކިޔަވާކުދިންގެ ހާލު ގާތުން ބަލަމުންކަމަށެވެ. އަދި މިދަނޑިވަޅުގައި ކުރުސްކްގައި ދިރިއުޅޭ ދިވެހީންނާއި އަދި އެކި ބޭނުންތަކުގައި އެ ސަރަޙައްދަށް ދަތުރުކުރާ ދިވެހީންވެސް އަމިއްލަ ސަލާމަތަށް އިސްކަންދިނުމަށް އެ ވުޒާރާއިންވަނީ އިލްތިމާސްކުރައްވާފައެވެ.

Advertisement

ކުރުސްކް ސަރަޙައްދަށް ކުރިމަތިވެފައިވާ ނުރައްކަލުގެ މިދަނޑިވަޅުގައި އެ ސަރަޙައްދުގައި ދިރިއުޅޭ އެއްވެސް ދިވެއްސަކަށް އެހީތެރިކަން ބޭނުންވާނަމަ، އެކަން ޖަރުމަނުގައި ހުންނަ ދިވެހި އެމްބަސީއަށް އެންގުމަށް ވަނީ އެދިވަޑައިގަންނަވާފައެވެ.

މިހާރު ކުރިއަށްދާ ރަޝިޔާ-ޔޫކްރެއިން ހަނގުރާމައިގައި ކުރުސްކް ސަރަޙައްދަށްވެސް ހަމަލާ ދެމުންދާއިރު، އެއީ ގިނަ ޢަދަދެއްގެ ދިވެހި ދަރިވަރުން މެޑިސިންއާ ގުޅޭ ދާއިރާތަކުން ކިޔެވުމަށް ގޮސްއުޅޭ ސަރަޙައްދެއްކަން ފާހަގަކޮށްފައިވެއެވެ.