އިންޑިޔާގެ މިނިވަން ދުވަހުގެ މުނާސަބަތުގައި، ރައީސް ޑރ.މުޙައްމަދު މުޢިއްޒު އިންޑިޔާގެ ރައީސް ދްރައުޕަދީ މުރުމު އަދި ބޮޑުވަޒީރު ނަރެންދްރަ މޯދީއަށް މަރުހަބައި ދަންނަވައިފިއެވެ.
ރައީސް މިހެން ވިދާޅުވީ މިއަދު ފާހަގަ ކުރަމުންދާ އިންޑިޔާގެ 78 ވަނަ މިނިވަން ދުވަހާއި ގުޅިގެން އެކްސްގައި ކިރެއްވި ޕޯސްޓެއްގައެވެ.
ރައީސް މުޢިއްޒު ވަނީ މި ޕޯސްޓްގައި އިންޑިޔާގެ ހުރިހާ ރައްޔިތުންނަށް މިނިވަން ދުވަހުގެ ހެޔޮއެދުންތައް އަރިސްކުރައްވާފައެވެ.
ރައީސް މުޢިއްޒު ވިދާޅުވީ ރާއްޖެއާއި އިންޑިޔާއާ ދެމެދު އޮތް ގުޅުމަކީ ތާރީޚުގައި އަސްލު އޮތް ގުޅުމެއް ކަމަށާއި، މި ގުޅުން ވަނީ ރާއްޖެއާއި މުޅި ސަރަޙައްދުގެ ތަރައްޤީއާއި ކުރިއެރުމަށް މަގުފަހިކޮށްދޭ ގުޅުމަކަށް ވެފައި ކަމަށެވެ.
މީގެ އިތުރުން ރައީސް ވިދާޅުވެފައިވަނީ ކުރިއަށް އޮތްތަނަށް ބަލާއިރު، ދެ ޤައުމުގެ ދެމެދުގައި އޮތް މި ބަދަހި ގުޅުން އިތުރަށް ވަރުގަދަވެ، ދެ ޤައުމަށް ވެސް ފައިދާ ކުރާނެ ކަމަށެވެ. އަދި ދެ ޤައުމުން ޙާޞިލުކުރަން ބޭނުންވާ ލަނޑުދަނޑިތައް ޙާޞިލުކުރުމަށް މަގުފަހިވެގެންދާނެ ކަމުގެ ޔަޤީންކަން އޮތް ކަމަށް ވެސް ރައީސް ވިދާޅުވެފައިވެއެވެ.
Advertisement
This content is created and paid for by advertisers and does not involve Voice Journalists
