ރާއްޖޭގައި މަކުނު ވިދުރި ފެތުރިދާނެތޯ ބަލަން އެސެސްމަންޓެއް ހަދަން ފަށާފައި ވާކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން މިއަދު ބުނެފިއެވެ.

މަކުނުވިދުރި ފެތުރެމުންދާތީ ދުނިޔޭގެ ޞިއްޙީ ކުއްލި ނުރައްކަލުގެ ޙާލަތު އިއްޔެ ޑަބްލިޔު އެޗްއޯއިން ވަނީ އިޢުލާނުކޮށްފައެވެ. 

އެއާއެކު، އެޗްޕީއޭއިން މިއަދު އެކްސްގައި ކުރި ޕޯސްޓެއްގައި ބުނީ، ރާއްޖޭގައި މަކުނުވިދުރި ފެތުރުމުގެ ރިސްކު އޮތްތޯ ބެލުމަށް އެސެސްމަންޓެއް ހަދަމުންދާ ކަމަށާ، އެސެސްމަންޓު ހަދާ ނިމުމުން އެ ބައްޔަށް ރައްކާތެރިވުމަށް ފިޔަވަޅުތައް އަޅާނެ ކަމަށެވެ.

ނިއު ޔޯކް ޓައިމްސްގެ ރިޕޯޓެއްގައި ބުނެފައިވާ ގޮތުގައި، މި ބަލި މިހާރު ވަނީ އެފްރިކާގެ 13 ޤައުމެއްގައި ފެތުރިފައެވެ. މީގެ ތެރޭގައި ޑިމޮކްރެޓިކް ރިޕަބްލިކް އޮފް ކޮންގޯ (ޑީއާރުސީ) ވެސް ހިމެނެއެވެ. މި ޤައުމުގައި އެކަނި 14،000 އަށް ވުރެ ގިނަ މީހުންނަށް މި ބަލި ޖެހި، 524 މީހުން މަރުވެފައިވާ ކަމަށް ރިޕޯޓުގައި ބުނެފައިވެއެވެ.

މަކުނު ވިދުރި ނުވަތަ މަންކީ ޕޮކްސް ދުނިޔޭގެ އެކި ޤައުމުތަކުން ފެންނަތާ 65 އަހަރަށްވުރެ ގިނަ ދުވަސްވެފައިވާ ބައްޔެކެވެ. މިބަލީގެ ނުރައްކާ އެކި ދުވަސްވަރު ބޮޑުވެ ދުނިޔޭގެ ސިއްޙަތު ޖަމިއްޔާއިން ކުއްލި ނުރައްކަލުގެ ހާލަތު އެކި ދުވަސްވަރު ޢިއުލާން ކޮށްފައިވެއެވެ.

މިބައްޔަކީ ގައިންގަޔަށް އަރާ ބައްޔެކެވެ. އަދި ބައެއް ފަހަރު ޖަނަވާރުންގެ ފަރާތުންވެސް މިބަލި އިންސާނުންނަށް ޖެހިފައިވާކަން ރިކޯޑުކުރެވިފައިވެއެވެ.

މިބަލި ފެތުރުމުގެ ފުރުސަތު އޮންނަނީ ބަލި ޖެހިފައިވާ މީހާގެ ހަށިގަނޑުން ބޭރުވާ ދިޔަ އެހެން މީހެއްގެ ހަށިގަނޑަށް ވާސިލުވުމުންނެވެ. މިގޮތުން ކެއްސާ ކިނބިހި އެޅުމާއި ޖިންސީ ގުޅުން ހިނގުމާއި ބަލި ޖެހިފައިވާ މީހާ ބޭނުންކޮށްފައިވާ އެއްޗެއް ބޭނުންކުރުން ހިމެނެއެވެ. އޭގެތެރޭގައި އަންނައުނާއި ސިރިންޖު ފަދަ ތަކެތި ހިމެނެއެވެ.