ތައިލެންޑްގެ ދުސްތޫރީ ކޯޓުން އެ ގައުމުގެ ބޮޑުވަޒީރު ސެއްތާ ތަވީސިން މަގާމުން ވަކިކޮށްފިއެވެ.

ދުސްތޫރީ އެންމެ މަތީ ކޯޓުން ނެރުނު ޙުކުމުގައި ބުނެފައިވަނީ، ކުރިން ޖަލަށްލާފައިވާ މީހަކު ވަޒީރަކަށް އައްޔަންކުރުމުގައި ސެއްތާ އަމަލުކޮށްފައިވާތީވެ، އެކަމަކީ ކަންޑައެޅިގެން އެގައުމުގެ ގާނޫނީ އަސާސީއާ ހިލާފުކަމެއްކަމަށެވެ.

ދުސްތޫރީ ކޯޓުގެ ފަނޑިޔާރުންގެ މެޖޯރިޓީ 5-4 އިން ވަނީ ސެއްތާ މަގާމުން ވަކިކުރުމަށް ވޯޓުދީ އޭނާގެ ވާޖިބު އަދާކުރުމުގައި ތެދުވެރިކަމާއެކު ޢަމަލުކޮށްފައި ނުވާ ކަމަށް ފަނޑިޔާރުން ވަނީ ނިންމާފައެވެ.

ރިއަލް އެސްޓޭޓް މިލިއަނަރެއް ކަމުގައިވާ ސެއްތާއަކީ ވޭތުވެދިޔަ 16 އަހަރު ތެރޭގައި މި ކޯޓުގެ ޙުކުމަކުން މަގާމުން ވަކިކުރެވުނު ހަތަރުވަނަ ބޮޑުވަޒީރެވެ. 

ސެއްތާ މަގާމުން ވަކިވުމާ ގުޅިގެން، މިކަމުގެ ސަބަބުން ގިނަ އަހަރުތަކެއް ވަންދެން ސިޔާސީ ހަމަނުޖެހުމާއި ކޯޓު ޙުކުމްތަކުން ސަރުކާރުތަކާއި ސިޔާސީ ޕާޓީތައް ވައްޓާލަމުން އައި ގައުމެއްގައި އިތުރު ހަމަނުޖެހުމެއް އުފެދިދާނެ ކަމުގެ ބިރު ވަނީ އުފެދިފައެވެ.

ސެއްތާ ނިސްބަތްވާ ޕާޓީ ކަމުގައިވާ ފިއު ތައި ޕާޓީން ވަނީ މިކަމާ ގުޅިގެން، ހެނދުނު ބައްދަލުވުމެއް ބާއްވާފައެވެ. މި ބައްދަލުވުމުގައި އައު ބޮޑުވަޒީރެއް ހޮވުމާ ގުޅޭގޮތުން ވަނީ މަޝްވަރާކޮށްފައެވެ. ތައިލެންޑަކީ އެޤައުމުގެ އަސްކަރިއްޔާއިން، ވެރިކަމުގެ ބާރަށް ވަރަށްބޮޑަށް ނުފޫޒާއި ބާރުފޯރުވާ ޤައުމެއްގެ ގޮތުގައި ފާހަގަކުރެވޭ ޤައުމެކެވެ.