ނ.މަނަދޫގައި މަރާލާފައި އޮއްވައި ފެނުނު އެ ރަށު ނައީމާ މޫސާގެ މަރުގެ ފަހަތުގައި ހުރީ ފަވާޒު ކަމަށް ދައުލަތުން ބުނެފިއެވެ.

މި މައްސަލަ އާއި ގުޅިގެން ދައުލަތުން ދައުވާ އުފުލާފައިވަނީ އެރަށަށް ނިސްބަތްވާ ހަސަން ފަވާޒް (21 އ) ، އަހްޒަމް އަބްދުއްޝަކޫރު (23 އ) އާއި އަބްދުލްވާހިދު ރިފާސް (20 އ) ގެ މައްޗަށެވެ.

 ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ކުށުގެ ދައުވާ އާއި މައްޔިތާގެ ބޭނުން ނަހަމަ ގޮތުގަ ބޭނުން ކުރުމުގެ ކުށުގެ ދައުވާ އަދި އަދުލު އިންސާފު ގާއިމް ކުރަން ހުރަސް އެޅުމުގެ ކުށުގެ ދައުވާ މި ތިން މީހުންގެ މައްޗަށް ވެސް އުފުލާފައިވާއިރު، އޭގެ ތެރެއިން ފަވާޒްގެ މައްޗަށް ދައުވާތައް އުފުލި ސަބަބު ހާމަކުރަމުން ދައުލަތުން މިއަދު ބުނީ، ރިފާސް އާއި އަހުޒަމްއަށް އިރުޝާދުދީ މި އަމަލު ހިންގާފައި ވަނީ އޭނާ ކަމަށެވެ.

މިގޮތުން، ނައީމާއަކީ ސިހުރު ހަދާ މީހެއް ކަމަށާއި، ސިހުރު ހަދާ މީހުން މަރައިގެން ފާފަވެރި ނުވާނެ ކަމަށް ރިފާސް އަދި އަހުޒަމަށް ފަވާޒް ވިސްނައިދީފައިވާކަމަށާއި، ނައީމާ މަރާލުމަށް ބޭނުންވާ އާލަތްތައް ހޯދައި، އެ ދެ މީހުން ނައީމާ ދިރިއުޅޭ ގެއަށް ގެންދިޔައީ ފަވާޒް ދުއްވާ ކާރުގައި ކަމަށާއި، އެމީހުން ނައީމާ ދިރިއުޅޭ ގެއަށް ވަނީއްސުރެ ފޯނުން އެމީހުންނަށް ކަން ކުރާނެ ގޮތުގެ އިރުޝާދު ދީފައިވާ ކަމަށްވެސް ދައުލަތުން ވަނީ ބުނެފައެވެ.

މި ދައުވާތަކަށް އިންކާރުކުރަމުން ފަވާޒް ބުނީ، ނައީމާ މަރާލަން އެއްވެސް މީހަކަށް އެއްވެސް އިރުޝާދެއް އަދި އެއްވެސް އެހީތެރިކަމެއް ވެދީފައި ނުވާނެ ކަމަށާއި، މިކަމުގައި އޭނާގެ ބައިވެރިވުމެއް ނެތް ކަމަށެވެ.

މި މައްސަލައިގައި ދެން ހިމެނޭ ރިފާސްގެ އަޑުއެހުމުގައި ބުނީ، އޭނާގެ މައްޗަށް ކޮށްފައިވާ ދައުވާތަކަށް ޖަވާބެއް ދޭން އެނގޭނީ އޭނާގެ ވަކީލާ ވާހަކަދެއްކުމަށް ފަހު ކަމަށާއި، ވަކީލު ފޮނުވި ލިޔެކިޔުންތައް ވާރޭގެ ސަބަބުން ހަލާކުވެފައިވާތީ، ދައުވާތަކަށް އެއްބަސްވާންވެސް ނުވަތަ އިންކާރުކުރަންވެސް ނޭނގޭ ކަމަށެވެ.

މަނަދޫ އަންނާރުމާގޭ އުމުރުން 62 އަހަރުގެ ނައީމާ މޫސާ، ގިނަ ޒަހަމްތަކާއެކު އޭނާ ދިރިއުޅޭ ކޮޓަރީގައި މަރާލާފައި އޮއްވާ ފެނުނީ މިދިޔަ އަހަރުގެ އޭޕްރިލް މަހުގެ 7 ވަނަ ދުވަހުއެވެ. އޭނާ އަކީ އެގޭގައި އެކަނި ދިރިއުޅެމުންދިޔަ މީހެކެވެ. އަދި އޭނާ މަރުވެފައި އޮއްވާ ފެނުނީ ހަބަރެއް ނުވެގެން އާއިލާއިން ރިޕޯޓް ކުރުމުން ފުލުހުން ގޮސް ބެލުމުންނެވެ.