ގޫގުލްގެ ކުރީގެ ސީއީއޯ އެރިކް ޝްމިޓް ގޫގުލްގެ މުވައްޒަފުންގެ މަސައްކަތުގެ ވަގުތާ ބެހޭގޮތުން ސްޓޭންފޯޑް ޔުނިވަރސިޓީގައި ދެއްކެވި ވާހަކަފުޅުތަކަށް މަޢާފަށް އެދިވަޑައިގެންފިއެވެ. އޭނާ މަޢާފަށް އެދިވަޑައިގަތީ ގޭގައި ތިބެގެން މުވައްޒަފުން މަސައްކަތްކުރުމުގެ ގޫގުލްގެ ސިޔާސަތާ ގުޅޭގޮތުން ދެއްކެވި ވާހަކަފުޅުތަކަށް ފަހުގައެވެ.

ވޯލް ސްޓްރީޓް ޖާރނަލަށް ފޮނުއްވި އީމެއިލެއްގައި ޝްމިޓް ވިދާޅުވެފައިވަނީ ގޫގުލްއާއި އެ ކުންފުނީގެ މަސައްކަތުގެ ވަގުތުތަކާ ބެހޭގޮތުން އޭނާ ދެއްކެވި ވާހަކަތައް ރަނގަޅު ނޫންކަމަށެވެ. އޭއީ އޭނާއަށް އޮޅުމަކުން ދެކެވުނު ވާހަކަތަކެއް ކަމަށްބުނެ އެކަމާ ހިތާމާ ކުރައްވާ ކަމަށްވެސް ވަނީ ވިދާޅުވެފައެވެ.  

ސްޓޭންފޯޑްގައި އޭނާ ދެއްކެވި ވާހަކަފުޅުގައި ޝްމިޓް ވިދާޅުވެފައިވަނީ ގޫގުލްއިން މަސައްކަތާއި އަމިއްލަ ދިރިއުޅުމުގެ ވަގުތު ހަމަހަމަކޮށް ބެހެއްޓުމަށާއި ގޭގައި މަސައްކަތްކުރުމަށް އިސްކަންދިނުމުގެ ސަބަބުން އެ ކުންފުނިން މުވައްޒަފުންގެ އުފެއްދުންތެރިކަމަށް ދޭންޖެހޭ ސަމާލުކަން ދެވިފައިނުވާ ކަމަށެވެ. އަދި މިކަމުގެ ސަބަބުން އާޓިފިޝަލް އިންޓެލިޖެންސްގެ ދާއިރާގައި އެހެން ކުންފުނިތަކަށްވުރެ ގޫގުލް ފަހަތަށް ޖެހިފައިވާ ކަމަށެވެ.

ނަމަވެސް މިހާރު ޝްމިޓް ވަނީ އޭނާ ދެއްކެވި ވާހަކަފުޅުތަކާމެދު ހިތާމަކުރައްވާ، އެ ވީޑިއޯ ނައްތާލުމަށް އެދިވަޑައިގެންފައެވެ.

ޝްމިޓްގެ ޚިޔާލުފުޅުތަކަކީ ދުނިޔޭގެ އެކި ކަންކޮޅުތަކުގައި ތިބި ގިނަ ލީޑަރުންގެ ޚިޔާލުތަކާ އެއްގޮތް ކަންތައްތަކެކެވެ. ޚާއްޞަކޮށް ޓެކްނޮލޮޖީ ދާއިރާގެ ކުންފުނިތަކުން ވަނީ ގޭގައި މަސައްކަތްކުރުމާއި ހައިބްރިޑް މަސައްކަތުގެ މާހައުލުގެ ސަބަބުން އުފެއްދުންތެރިކަމަށް ކުރާ އަސަރުތަކާމެދު ކަންބޮޑުވުން ފާޅުކޮށްފައެވެ. އަދި މިހާރު ގިނަ ކުންފުނިތަކުން ވަނީ ހަފްތާއަކު ތިން ދުވަހު އޮފީހަށް ނުކުތުމަށް ލާޒިމްކޮށްފައެވެ.

އެހެންނަމަވެސް، އެމެރިކާއާއި ކެނެޑާގެ ގޫގުލްގެ 1,000 އެއްހާ މުވައްޒަފުން ތަމްސީލުކުރާ އެލްފަބެޓް ވޯކަރސް ޔޫނިއަންއިން ބުނެފައިވަނީ ގޭގައި މަސައްކަތްކުރުމުގެ ސަބަބުން އުފެއްދުންތެރިކަމަށް ނޭދެވޭ އަސަރެއް ނުކުރާ ކަމަށެވެ. އޭގެ ބަދަލުގައި މުވައްޒަފުން މަދުވުމާއި، އަމާޒުތައް ބަދަލުވަމުންދިއުމާއި، ވަޒީފާތަކުން ވަކިކުރުމާއި، މުސާރަ އުނިކުރުވުމާއި، މެނޭޖްމަންޓުން މަޝްރޫޢުތަކަށް އެކަށީގެންވާ ސަމާލުކަން ނުދިނުން ފަދަ ކަންކަމުގެ ސަބަބުން އުފެއްދުންތެރިކަމަށް އަސަރުކުރާ ކަމަށެވެ.

މިއަހަރުގެ ފެށުނީއްސުރެ ގޫގުލްއިން ވަނީ 8 ފަހަރެއްގެ މަތިން މުވައްޒަފުން ވަޒީފާއިން ވަކިކޮށްފައެވެ. މީގެ ކުރިން ވޭތުވެދިޔަ އަހަރުވެސް 12,000 މުވައްޒަފުން ވަނީ ވަޒީފާއިން ވަކިކޮށްފައެވެ.