މިދިޔަ އަންގާރަ ދުވަހު ކުރި ގަދަ ވިއްސާރައިގައި މާލެ އާއި އަތޮޅުތެރޭގެ ރަށްތަކަށް ލިބުނު ގެއްލުންތައް ބެލުމުގެ މަސައްކަތް ނެޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ދަނީ ކުރަމުންކަމަށް އެ އޮތޯރިޓީން ބުނެފިއެވެ.

އެންޑީއެމްއޭ އިން މައުލޫމާތު ދެއްވިގޮތުގައި މާލޭގައި ވިއްސާރައިގެ ސަބަބުން ފެންބޮޑުވެގެން ލިބުނު ގެއްލުންތައް ބެލުމަށް 11 ޓީމެއް މަސައްކަތް ކުރަމުންދެއެވެ. މި ޓީމުތަކުން، ގެއްލުން ބޮޑަށް ލިބުނު ގޭބިސީތަކަށް ޒިޔާރަތްކޮށް ގެއްލުންތައް ބަލަމުންދާކަމަށް އެ އޮތޯރިޓީން ބުނެފައިވެއެވެ.

މީގެ އިތުރުން، އަތޮޅުތެރޭގެ ރަށްތަކަށް ލިބުނު ގެއްލުންތައް ބެލުމުގެ މަސައްކަތް ކައުންސިލްތަކާ ގުޅިގެން ކުރިއަށް ގެންދާކަމަށްވެސް އެންޑީއެމްއޭ އިން ބުނެފައިވެއެވެ.

މާލޭގައި ގެއްލުންތައް ބެލުމުގެ މަސައްކަތުގައި މޯލްޑިވްސް ރެޑް ކްރެސެންޓް އާއި މޯލްޑިވްސް ނެޝަނަލް ޑިފެންސް ފޯސްގެ އެހީތެރިކަން ލިބެމުންދާކަމަށް އެންޑީއެމްއޭ އިން ފާހަގަކޮށްފައިވެއެވެ. އަދި މި މަސައްކަތުގައި އެހީތެރިވެދެއްވި ފަރާތްތަކަށް ޝުކުރު އަދާކޮށްފައިވެއެވެ.

މިދިޔަ އަންގާރަ ދުވަހު ކުރި ބޯ ވިއްސާރައިގައި މާލެ އާއި އަތޮޅުތެރޭގެ ގިނަ ރަށްތަކެއްގައި ފެންބޮޑުވެ، ގިނަ ގެތަކަކަށް ގެއްލުން ލިބިފައިވާކަން ފާހަގަކުރެވެއެވެ.