ޞިއްޙަތާއި ދުޅަހެޔޮކަމުގެ ވާހަކަ ދައްކާއިރު، ބައެއްފަހަރު އެންމެ އާދައިގެ ކާނާއިން އެންމެ ބޮޑު ފައިދާ ކުރެއެވެ. ކަދުރު ރުކުގެ މޭވާ ކަމުގައިވާ ކަދުރަކީ މިފަދަ ތަކެތީގެ ތެރެއިން އެއް އެއްޗެވެ. ޒަމާންތަކެއް ވަންދެން ކަދުރުގެ ރަހަ ރަނގަޅުކަމާއި ޠަބީޢީ މީރުކަމަށްޓަކައި އަގުހުރި އެއްޗެއްގެ ގޮތުގައި ބެލެވިފައިވީ ނަމަވެސް، އޭގެ ފައިދާތައް ހަމައެކަނި ރަހައާ ހަމައިން ނުނިމެއެވެ. ކޮންމެ ދުވަހަކު ތިން ކަދުރު ކެއުމުން ލިބޭ ގިނަގުނަ ޞިއްޙީ ފައިދާތައް އެނގުމުން ބައެއް މީހުން ހައިރާންވެސް ވެދާނެއެވެ.

ކޮންމެ ދުވަހަކު ކަދުރު ކެއުމުގެ އެންމެ ފާހަގަކޮށްލެވޭ ފައިދާތަކުގެ ތެރެއިން އެއް ފައިދާއަކީ ހަޖަމުކުރުމުގެ ނިޒާމުގެ ދުޅަހެޔޮކަން އިތުރުކޮށްދިނުމެވެ. ކަދުރުގައި ގިނަ އަދަދަކަށް ފައިބަރު އެކުލެވިފައިވާތީ، އޭގެ ސަބަބުން ކަދުރަކީ ގުދުރަތީ ލެކްސެޓިވްއެއްގެ ގޮތުގައި މަސައްކަތްކޮށް، ހަޖަމުކުރުމަށް އެހީވެދީ އަދި ބަނޑު ހަރުވުމުގެ މައްސަލަ ހައްލު ކުރުމަށް އެހީވެއެވެ.

Advertisement

Advertisement

ގުދުރަތީގޮތުން ހަކަތަ އިތުރުކުރަން ބޭނުންވޭތަ؟ ކަދުރަކީ އޭގެ އެންމެ ރަނގަޅު ޙައްލެވެ. އޭގައި ހިމެނޭ މަތީ މިންވަރެއްގެ ކާބޯހައިޑްރޭޓާއި، ގްލޫކޯސް، ފްރުކްޓޯސް އަދި ސުކްރޯސް ފަދަ ގުދުރަތީ ހަކުރުތަކާއެކު، އެއީ އަވަހަށް އަދި ދެމެހެއްޓެނިވި ގޮތެއްގައި ހަކަތަ ލިބޭ ރަނގަޅު މަސްދަރެކެވެ. ޖާނަލް އޮފް ދަ އިންޓަނޭޝަނަލް ސޮސައިޓީ އޮފް ސްޕޯޓްސް ނިއުޓްރިޝަންގައި ޝާއިޢުކޮށްފައިވާ ދިރާސާއަކުން ދައްކާގޮތުގައި ކަސްރަތުކުރުމުގެ ކުރިން ކަދުރު ކެއުމުން ޕަރފޯމަންސްއާއި ބުންވަރު އިތުރުވެއެވެ.

ހިތުގެ ސިއްޙަތު ދުޅަހެޔޮކޮށް ބެހެއްޓުމަކީ މުޅި ހަށިގަނޑުގެ ދުޅަހެޔޮކަމަށް މުހިންމު ކަމެކެވެ. އަދި ކަދުރަކީ ހިތް ދުޅަހެޔޮކަންމަތީ ބެހެއްޓުމަށް ބޭނުން ކުރެވިދާނެ އެއްޗެކެވެ. ދިރާސާތަކުން ދައްކާގޮތުގައި ކަދުރުން ކޮލެސްޓްރޯލްގެ މިންވަރު ދަށްކޮށް، ހިތުގެ ބަލިތަކަށް މީހާ ހުށަހެޅުމުގެ ފުރުސަތު ކުޑަކުރެއެވެ. ޖާނަލް އޮފް އެގްރިކަލްޗަރަލް އެންޑް ފުޑް ކެމިސްޓްރީގައި ޝާއިޢުކޮށްފައިވާ ދިރާސާއެއްގައި ވާގޮތުން، ކަދުރުގައި ހިމެނޭ އެންޓިއޮކްސިޑެންޓްތަކުން އެލްޑީއެލް ކޮލެސްޓްރޯލް އޮކްސިޑައިޒްވުން ހުއްޓުވުމަށް އެހީތެރިވެދާނެއެވެ. ކޮލެސްޓްރޯލް އޮކްސިޑައިޒް ވުމަކީ ލޭހޮޅިތަކުގައި ޕްލާކް އުފައްދައި ބައްދާލުމަށް މަގުފަހިވާ ކަމެކެވެ.

ސިކުނޑިއަށް ބޭނުންވަނީ ފައިދާހުރި ކާނާގެ ރަނގަޅު އެހީތެރިކަމެކެވެ. އަދި ކަދުރަކީ ސިކުނޑީގެ މަސައްކަތްތައް ރަނގަޅުކުރުމަށް އެހީވެދޭ އެއްޗެކެވެ. ނާރުތަކުގެ މަސައްކަތްތަކަށް ކޮންމެހެން ބޭނުންވާ ޕޮޓޭސިއަމްއިން މުއްސަނދި ކަދުރުން ސިކުނޑީގެ ދުޅަހެޔޮކަމާއި ހަނދާން ރަނގަޅުކުރުމަށް އެހީތެރިވެދެއެވެ. އެމެރިކަން ޖާނަލް އޮފް ކްލިނިކަލް ނިއުޓްރިޝަންގައި ޝާއިޢުކުރެވުނު ދިރާސާއަކުން ދައްކައިދެނީ ކަދުރު ފަދަ ޕޮޓޭސިއަމްއިން މުއްސަނދި ކާނާއިން ސްޓްރޯކްގެ ނުރައްކާ ކުޑަކޮށް، އުމުރުން ދުވަސްވުމުން ކުރިމަތިވާ ސިކުނޑީގެ ބަލިތަކުން ރައްކާތެރިވެވިދާނެކަމެވެ.

އުމުރުން ދުވަސްވަމުންދާއިރު، ވަރުގަދަ އަދި ދުޅަހެޔޮ ކަށިތަކެއް ދެމެހެއްޓުމަކީ އިތުރަށް މުހިންމުވާ ކަމެކެވެ. ކަދުރަކީ ކެލްސިއަމް، ފޮސްފަރަސް އަދި މެގްނީޒިއަމް ފަދަ މައުދަނީ ތަކެތީގެ ޤުދުރަތީ މަސްދަރެކެވެ. މި ހުރިހާ އެއްޗަކީވެސް ކަށީގެ ދުޅަހެޔޮކަމަށް މުހިންމު އެއްޗެހިއެވެ. ޖާނަލް އޮފް އެތްނޯފާމަކޮލޮޖީގައި ޝާއިޢުކުރެވުނު ދިރާސާއަކުން ހުށަހަޅާގޮތުގައި އާންމުކޮށް ކަދުރު ކެއުމުން ބޯންލޮސް ވުން ހުއްޓުވައި، އޮސްޓިއޯޕޮރޯސިސްގެ ނުރައްކާ ކުޑަކުރެވިދާނެއެވެ.

ގިނަ ބަޔަކު ދެކޭގޮތާ ޚިލާފަށް، ހަކުރުބަލީގެ ބަލިމީހުންނަށްވެސް ބެލެންސްކުރެވިފައިވާ ކާނާގެ ތެރެއަށް ކަދުރު ހިމެނިދާނެއެވެ. ކަދުރަކީ ޠަބީޢީގޮތުން މީރު އެއްޗެއް ނަމަވެސް، އޭގެ ގްލައިސެމިކް އިންޑެކްސް ދަށެވެ. މާނައަކީ ކަދުރު ހަޖަމުވެ ހަށިގަނޑަށް ބޭނުންކުރެވެނީ ލަހުންކަމާއި، އޭގެ ސަބަބުން ލޭގައި ހުންނަ ހަކުރުގެ މިންވަރު މައްޗަށް ދަނީ މަޑުމަޑުންކަމެވެ. ޖާނަލް އޮފް މެޑިސިނަލް ފުޑްގައި ޝާއިޢުކުރެވުނު ދިރާސާއަކުން ދައްކާގޮތުގައި ހަކުރުބަލީގެ ބަލިމީހުންގެ ކެއުމުގެ ޕްލޭނަށް ކަދުރު އިތުރުކުރުމުން ލޭގައި ހުންނަ ހަކުރުގެ މިންވަރު ރަނގަޅަށް ކޮންޓްރޯލްކުރެވި، ލިޕިޑް ޕްރޮފައިލްތައް ރަނގަޅުވެފައިވެއެވެ.