މަތީ ތައުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާބެހޭ ވަޒީރު ޑރ. މަރްޔަމް މާރިޔާ ޗައިނާގެ ބެއިޖިން ނޯމަލް ޔުނިވާސިޓީގެ ދަޢުވަތަކަށް ޗައިނާއަށް ވަޑައިގެންފިއެވެ.

މި ދަތުރުފުޅުގައި، ޑރ. މާރިޔާ ބެއިޖިން ނޯމަލް ޔުނިވާސިޓީގެ އިސްވެރިންނާ ބައްދަލުކުރައްވާނެއެވެ. މީގެ ތެރޭގައި ޔުނިވާސިޓީގެ ޕްރެޒިޑެންޓް ޕްރޮފެސަރ ޔޫ ޖިއޮންޖް އާއި، ވައިސް ޕްރެޒިޑެންޓް ޕްރޮފެސަރ ޖޯ ޒުއޮޔު، އަދި ސްމާޓް ލާރނިންގ އިންސްޓިޓިއުޓްގެ ވައިސް ޑީން ހިމެނެއެވެ.

މީގެއިތުރުން، ޑރ. މާރިޔާ "ރައުންޑް ޓޭބަލް އޮން ވިމެންސް ލީޑަރޝިޕް އިން ދަ އޭޖް އޮފް އޭއައި" ގައި ޕެނަލިސްޓެއްގެ ގޮތުގައި ބައިވެރިވެވަޑައިގަންނަވާނެއެވެ. އަދި "ޑިވެލޮޕްމަންޓް އެންޑް ޔޫސް އޮފް ޑިޖިޓަލް ޓެކްސްޓް ބުކް" ފޯރަމްގައިވެސް ބައިވެރިވެވަޑައިގަންނަވާނެކަމަށް ވުޒާރާއިން މަޢުލޫމާތު ދެއްވިއެވެ.

Advertisement

މި ދަތުރުފުޅަކީ ދިވެހިރާއްޖޭގެ މަތީ ތަޢުލީމާއި ތަމްރީނުގެ ފެންވަރު އިތުރަށް ރަނގަޅުކޮށް، ހުނަރުވެރި ޖީލެއް ބިނާކުރުމަށް ކުރެވޭ މަސައްކަތުގެ ތެރެއިން ކުރެވޭ ދަތުރުފުޅެކެވެ. އަދި ދިވެހި ޒުވާނުންނަށް މަތީ ތަޢުލީމުގެ ފުރުސަތުތައް އިތުރުކުރުމަށް ވުޒާރާއިން ކުރަމުންދާ މަސައްކަތްތަކުގެ ބައެއްކަމުގައިވެސް ފާހަގަކުރެވެއެވެ.