ބިދޭސީންނާ ގުޅޭ ފީތަކާއި ޖޫރިމަނާތައް ދެއްކުމަށް ދައުލަތުން ދީފައިވާ މުއްދަތު އިތުރުކޮށްފިއެވެ.
މިނިސްޓްރީ އޮފް ހޯމްލޭންޑް ސެކިއުރިޓީން މިއަދު ނެރުނު އިޢުލާނެއްގައި ބުނެފައިވާ ގޮތުން، މި މުއްދަތު މިހާރު އިތުރުކޮށްފައިވަނީ މި މަހުގެ 31 ވަނަ ދުވަހުގެ ނިޔަލަށެވެ.
ކުރިން މިނިސްޓްރީން އިޢުލާންކޮށްފައިވަނީ މި މަހުގެ 12 ގެ ނިޔަލަށް ފީތަކާއި ޖޫރިމަނާތައް ނުދައްކާ ފަރާތްތަކަށް ބިދޭސީންނާ ގުޅޭ އެންމެހައި ޚިދުމަތްތައް މެދުކަނޑާލާނެ ކަމަށެވެ. އަދި "އެކްސްޕެޓް ޕޯޓަލް" އިން އެފަދަ ފަރާތްތައް ސަސްޕެންޑް ކުރެވޭނެ ކަމަށްވެސް ބުނެފައިވެއެވެ.
މިއަދުގެ އިޢުލާނުގައި ބަޔާންކޮށްފައިވާ ގޮތުން، ސެޕްޓެމްބަރު 1 އިން ފެށިގެން ފީތަކާއި ޖޫރިމަނާތައް ނުދައްކާ ފަރާތްތައް "އެކްސްޕެޓް ޕޯޓަލް" އިން ސަސްޕެންޑް ކުރެވޭނެއެވެ.
މިދިޔަ ޖުލައި މަހު މިނިސްޓްރީން ވަނީ 100،000 ރުފިޔާއަށްވުރެ ގިނަ އަދަދެއްގެ ފައިސާ ނުދައްކާ ހުރި ފަރާތްތަކުގެ ލިސްޓެއް ޢާންމުކޮށްފައެވެ. މި ލިސްޓުގައި ހިމެނޭ ބައެއް ބޮޑެތި ކުންފުނިތަކުން މިހާރު ވަނީ ޖޫރިމަނާތައް ދައްކާ ނިންމާފައެވެ.
Advertisement
This content is created and paid for by advertisers and does not involve Voice Journalists
