ފްރާންސްގެ ވެރިރަށް ޕެރިހުގައި މިއަހަރު ބޭއްވުމަށް ހަމަޖެހިފައިވާ ޕެރަލިމްޕިކްސްގައި ދިވެހިރާއްޖެ ތަމްސީލުކުރާނެ ދެ އެތުލީޓުންނަށް ރަސްމީކޮށް ޖާރޒީ ހަވާލުކޮށްފިއެވެ.
ޕެރަލިމްޕިކްސްގައި ދިވެހިރާއްޖެ ތަމްސީލުކުރާނީ ފާތިމަތު އިބްރާހިމް (ފާތުން) އާއި އަބްދުއްރައްޒާޤެވެ. މި ދެ އެތުލީޓުންނަށް ޖާރޒީ ހަވާލުކޮށްދެއްވީ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު އެވެ.
މި ދެ އެތުލީޓުންނަށް ޕެރަލިމްޕިކްސްގައި ވާދަކުރުމުގެ ފުރުސަތު ލިބިފައިވަނީ ރާއްޖޭގެ ރޭންކިންގެ އެންމެ ކުރީގައި އޮތް ދެ ދުވުންތެރިންނަށް ވާތީއެވެ. މި ދެ ދުވުންތެރިން ވަނީ ދާދިފަހުން ބޭއްވި އިންޑިއަން އޯޝަން އައިލެންޑު ގޭމްސްގައިވެސް ރާއްޖެ ތަމްސީލުކޮށްފައެވެ.
ފާހަގަކޮށްލެވޭ ކަމަކީ، 2021 ވަނަ އަހަރު ޖަޕާނުގައި ބޭއްވުނު ޕެރަލިމްޕިކްސްގައި ފާތުން ވަނީ ރާއްޖެ ތަމްސީލުކޮށްފައެވެ. އެއީ ރާއްޖޭގެ އެތުލީޓުން އެންމެ ފުރަތަމަ ވާދަކުރި ޕެރަލިމްޕިކްސް ގޭމްސް އެވެ. އޭރު ދުވުމުގެ އިވެންޓްގައި ވާދަކޮށް ފާތުން ވަނީ ރޭސް ނިންމައި، ޕެރަލިމްޕިކް ގޭމްސްއެއްގައި ރޭހެއް ނިންމި ރާއްޖޭގެ ފުރަތަމަ އެތުލީޓަށް ވެފައެވެ.
މީގެއިތުރުން މަޑަގަސްކަރުގައި އެންމެ ފަހުން ބޭއްވި އިންޑިއަން އޯޝަން އައިލެންޑް ގޭމްސްގައި ފާތުން ވަނީ ރާއްޖެއަށް ބްރޮންޒް މެޑަލް ހޯދައިދީފައެވެ.
ރައްޒާގު އެންމެ ފުރަތަމަ ބައިނަލްއަގްވާމީ މުބާރާތެއްގައި ވާދަކޮށްފައިވަނީ މިދިޔަ އަހަރުގެ އިންޑިއަން އޯޝަން އައިލެންޑް ގޭމްސްގައެވެ. އޭނާ ވަނީ މި މުބާރާތުން ބްރޮންޒް މެޑަލް ހޯދާފައެވެ.
ގޭމްސްއަށް ތައްޔާރުވުމުގެ ގޮތުން ރައްޒާގު އާއި އޭނާގެ ކޯޗިން ޓީމު ތިބީ ހުޅުމާލޭގައި ކޭމްޕްކޮށްގެންނެވެ. މި ދެ ދުވުންތެރިން ފްރާންސަށް ފުރުމަށް ހަމަޖެހިފައިވަނީ އަންނަ އަންގާރަ ދުވަހުއެވެ.
Advertisement
This content is created and paid for by advertisers and does not involve Voice Journalists
