ނެޝަނަލް ޑިޒާސްޓަރ މެނޭޖްމަންޓް އޮތޯރިޓީއަށް ފެން ޕަމްޕަކާއި 15 ފަސްޓް ރެސްޕޮންޑަރސް ސޭފްޓީ ކިޓްސް އެހީޖަމިއްޔާއިން ހަވާލުކޮށްފިއެވެ. މި ތަކެތި ހަވާލުކުރުމުގެ ރަސްމިއްޔާތު ބޭއްވުނީ މިއަދު އެ އޮތޯރިޓީގައެވެ.

މި ތަކެތި ހަވާލުކުރުމާ ގުޅިގެން އެހީޖަމިއްޔާގެ ފަރާތުން ވިދާޅުވީ މިއީ އެ ޖަމިއްޔާގެ އެހީ ޓީމަށްވެސް ލިބިގެންދިޔަ ވަރަށް ބޮޑު އުފަލެއް ކަމަށެވެ. އަދި މި ތަކެތީގެ ސަބަބުން ގަދަ ވިއްސާރައާ ގުޅިގެން އެ އޮތޯރިޓީން ހިންގަވާ އެމަޖެންސީ ރެސްޕޮންސް ހަރަކާތްތަކަށް ލުޔެއް ލިބިގެންދާނެ ކަމުގެ އުންމީދު ފާޅުކުރެއްވިއެވެ.

އެހީޖަމިއްޔާގެ ފަރާތުން އިތުރަށް ވިދާޅުވީ މިފަދަ ކުއްލި ހާލަތްތަކުގައި އެހީތެރިވުމަކީ ހަމައެކަނި އެއް ފަރާތެއްގެ ޒިންމާއެއް ނޫން ކަމަށާއި، މިއީ އެންމެންގެވެސް މަސައްކަތެއް ކަމަށެވެ.

Advertisement

ނެޝަނަލް ޑިޒާސްޓަރ މެނޭޖްމަންޓް އޮތޯރިޓީގެ ފަރާތުން މި އެހީއަށް ޝުކުރު އަދާކުރައްވައި، މިފަދަ އެހީތަކަކީ އެ އޮތޯރިޓީގެ މަސައްކަތްތައް އިތުރަށް ހަރުދަނާކުރުމަށް ލިބޭ ވަރަށް ބޮޑު ބާރަކަށް ވާނެ ކަމަށް ވިދާޅުވިއެވެ. އަދި ކުރިއަށް އޮތް ތަނުގައިވެސް މިފަދަ އެހީތެރިކަން ލިބެމުންދާނެ ކަމުގެ އުންމީދު ފާޅުކުރެއްވިއެވެ.