ރާއްޖޭގައި މަސްތުވާތަކެތީގެ މައްސަލަ އޮތް މިންވަރާއި ބޭނުންކުރާ މީހުންގެ އަދަދު ދެނެގަތުމަށް ނެޝެނަލް ޑްރަގް އެޖެންސީ (އެންޑީއޭ) އިން ދިރާސާއެއް ހެދުމަށް ނިންމައިފިއެވެ.
އެސްއެސްޓީވީގެ ބާރު ހަތަރެއް ޕްރޮގްރާމުގައި އެންޑީއޭގެ މަސައްކަތްތަކާއި ފަރުވާގެ ނިޒާމު ބައްޓަންވެފައިވާ ގޮތާ ބެހޭގޮތުން ވާހަކަ ދައްކަވަމުން އެންޑީއޭގެ ވައިސް ޗެއާޕާސަން އިސްމާއިލް ޒާހިރު ވިދާޅުވީ، މަސްތުވާތަކެތީގެ މައްސަލައިގެ ހާލަތު އަންގައިދޭ ދިރާސާއެއް އެންމެ ފަހުން ހަދައިފައިވަނީ 2011 ވަނަ އަހަރު ކަމަށެވެ.
އަލަށް ހަދާ މި ދިރާސާއިން މައިގަނޑު ގޮތެއްގައި ބަލަން ބޭނުންވަނީ ރާއްޖޭގައި މަސްތުވާތަކެތި ބޭނުންކުރާ މީހުންގެ އަދަދާއި، އެ މީހުންގެ އުމުރުފުރައާއި، ބޭނުންކުރާ މަސްތުވާތަކެތީގެ ބާވަތްތައް ކަމަށް އޭނާ ވިދާޅުވިއެވެ.
ޒާހިރު ވިދާޅުވީ މި މަޢުލޫމާތުތައް އެކި އިދާރާތަކުގައި ހުރި ނަމަވެސް، ދިރާސާއެއްގެ ގޮތުގައި އެއް ތަނަކުން މަޢުލޫމާތު މިހާރު ފެންނަން ނެތް ކަމަށެވެ. އެގޮތުން މޯލްޑިވްސް ޕޮލިސް ސަރވިސް، އެންޑީއޭ އަދި ޑްރަގް ކޯޓުގައި ހުރި މަޢުލޫމާތުތައް ބޭނުންކޮށްގެން ހާލަތު ދެނެގަތުމުގެ ދިރާސާއެއް ކުރިއަށް ގެންދިއުމަށް ވަނީ ރާވައިފައެވެ.
މި ދިރާސާއަށްފަހު، ފަރުވާގެ ނިޒާމު ކުރިއަށް ގެންދިއުމަށް ދެން ކުރެވޭނީ ކޮން ކަންތައްތަކެއްތޯ ބަލައި، ދިރާސާގެ ހޯދުންތަކުގެ މައްޗަށް ބިނާކޮށް ފަރުވާ ދިނުމުގެ މަސައްކަތް ކުރިއަށް ގެންދިއުމަށް ނިންމައިފައިވާ ކަމަށްވެސް ޒާހިރު ވިދާޅުވިއެވެ.
މީގެއިތުރުން، މަސްތުވާތަކެތީގެ މައްސަލަ ހައްލުކުރުމަށް ޓަކައި ގާނޫނަށް ބަދަލު ގެނައުމުގެ މަސައްކަތްވެސް ކުރިއަށްދާ ކަމަށް އޭނާ ފާހަގަކުރެއްވިއެވެ. އެގޮތުން، ރާއްޖެއަށް 500 ގްރާމަށްވުރެ އިތުރަށް މަސްތުވާތަކެތި އެތެރެކުރާނަމަ އަދަބަކީ މަރުގެ އަދަބު ކަމަށް ކަނޑައަޅައި، މަސްތުވާތަކެއްޗާ ބެހޭ ގާނޫނަށް އިސްލާހު ހުށަހަޅަން ބިލެއް ހޯމް މިނިސްޓްރީން ވަނީ ޑްރާފްޓްކޮށްފައެވެ.
Advertisement
This content is created and paid for by advertisers and does not involve Voice Journalists
