ދައުލަތުގެ ޕްރޮކިއުމަންޓް ނިޒާމު ހަރުދަނާކުރުމަށް އިލެކްޓްރޯނިކް ގަވަމެންޓް ޕްރޮކިއުމަންޓް (އީ-ޖީޕީ) ސިސްޓަމެއް ގާއިމްކުރުމުގެ މަސައްކަތް ފިނޭންސް މިނިސްޓްރީން ވަނީ ފަށައިފައެވެ.
މި މަސައްކަތް ފެށުމުގެ ގޮތުން މިއަދު ފިނޭންސް މިނިސްޓްރީގައި ބައްދަލުވުމެއް ބޭއްވުނެވެ. މި ބައްދަލުވުމުގައި ފިނޭންސް މިނިސްޓަރު ޑރ. މުޙައްމަދު ޝަފީގު ބައިވެރިވެވަޑައިގެން، ބައިވެރިންނާ ވާހަކަފުޅު ދެއްކެވިއެވެ. މި މަޝްރޫޢު ފެށިފައިވާކަން ފިނޭންސް މިނިސްޓްރީން ވަނީ ސޯޝަލް މީޑިއާގައި ކުރެއްވި ޕޯސްޓެއްގައި ހިއްސާކޮށްފައެވެ.
އީ-ޖީޕީ ސިސްޓަމަކީ އިންފޮމޭޝަން ޓެކްނޮލޮޖީގެ އެހީގައި ސަރުކާރުގެ ޕްރޮކިއުމަންޓްގެ ކަންކަން ފަސޭހަކަމާއި ހަރުދަނާކަމާއެކު ހިންގުމަށް ބޭނުންކުރާ ނިޒާމެކެވެ. މި ނިޒާމުގެ ސަބަބުން ސަރުކާރުގެ ޕްރޮކިއުމަންޓްތަކުގެ ދެފުށް ފެންނަ މިންވަރު އިތުރުވެ، ހަރަދުތައް ކުޑަކުރެވި، އަދި މުޅި ނިޒާމުގެ ހަރުދަނާކަން އިތުރުވާނެ ކަމަށް ބެލެވެއެވެ.
މި ނިޒާމުގެ މުހިންމު ފައިދާތަކުގެ ތެރޭގައި ޕަބްލިކް ޓްރާންސެކްޝަންތަކާއި މަޢުލޫމާތު ފަސޭހައިން ލިބެން ހުރުމާއި، އޮޑިޓުތަކަށް ރިކޯޑުތައް ބެލެހެއްޓުން ހިމެނެއެވެ. މީގެ އިތުރުން، އާންމު ހަރަދުތައް ވަކި މިންގަނޑެއްގައި ހިފެހެއްޓުމާއި، އިޤްތިޞާދީ ކަންކަމުގައި ޓެކްނޮލޮޖީގެ ދައުރު ފުޅާކުރުން ފަދަ ކަންކަން ހާސިލުކުރެވޭނެއެވެ.
މި ނިޒާމު ތަޢާރަފުކުރުމުން ސަރުކާރުގެ ޕްރޮކިއުމަންޓް ނިޒާމަށް އައު ބަދަލުތަކެއް އަންނާނެ ކަމަށް ބެލެވެއެވެ. މި ބަދަލުތަކުގެ ސަބަބުން ދައުލަތުގެ ވަސީލަތްތައް އިތުރަށް ހަރުދަނާކަމާއެކު ބޭނުންކުރެވި، ޚިދުމަތްތައް ފޯރުކޮށްދިނުމުގައި ހަލުވިކަމާއި ހަރުދަނާކަން އިތުރުވާނެ ކަމަށް އުންމީދުކުރެވެއެވެ.
Advertisement
This content is created and paid for by advertisers and does not involve Voice Journalists
