ކުދި އަދި މެދު ފަންތީގެ ވިޔަފާރިތައް ކުރިއެރުވުމަށް ސަރުކާރުން ޤާއިމުކޮށްފައިވާ އެސްއެމްއީ ހަބުގައި ގަވާއިދާ ޚިލާފަށް ވިޔަފާރިކުރަމުންދިޔަ ބިދޭސީންތަކެއް މޯލްޑިވްސް އިމިގްރޭޝަނުން އަތުލައިގަނެފިއެވެ.
އިމިގްރޭޝަނުން މިއަދު ނެރުނު ނޫސްބަޔާނެއްގައި ބުނެފައިވަނީ "އިމިގްރޭޝަން ވޮޗް" އަށް ލިބުނު މަޢުލޫމާތަކާ ގުޅިގެން، އެސްއެމްއީ ހަބުގައި ހިންގި ޚާއްޞަ އޮޕަރޭޝަނެއްގައި ގަވާއިދާ ޚިލާފަށް އުޅެމުންދިޔަ 3 ބިދޭސީއަކު އަތުލައިގަނެވިފައިވާ ކަމަށެވެ. މި ބިދޭސީންނަކީ ދިވެހިރާއްޖޭގައި މަސައްކަތްކުރުމުގެ ހުއްދަ ނެތި، އަދި ވިޔަފާރިކުރުމުގެ ހުއްދަވެސް ނެތި އުޅެމުންދިޔަ ބައެއްކަން އިމިގްރޭޝަނުން ހާމަކޮށްފައިވެއެވެ.
އިމިގްރޭޝަނުން މިހާރު ދަނީ ރާއްޖޭގައި ގަވާއިދާ ޚިލާފަށް ވިޔަފާރިކުރަމުންދާ ބިދޭސީން ހޯދުމަށް ޚާއްޞަ އޮޕަރޭޝަނެއް ކުރިޔަށް ގެންދަމުންނެވެ. މިހާތަނަށް އަތުލައިގަނެވުނު މީހުން ޑީޕޯޓްކުރުމުގެ މަސައްކަތްވެސް އިމިގްރޭޝަނުން އަންނަނީ ކުރަމުންނެވެ.
ގަވައިދާ ޚިލާފަށް އުޅޭ ބިދޭސީންގެ މިފަދަ މައްސަލަތަކާ ގުޅިގެން ޢާންމު ރައްޔިތުންގެ ފަރާތުން ވެސް ޚިޔާލުތައް ފާޅުކުރަމުން ދެއެވެ. ގިނަ ފަރާތްތަކުން ގޮވާލަނީ މިފަދަ ޤާނޫނާ ޚިލާފު ޢަމަލުތަކުގައި ބައިވެރިވާ ދިވެހިންނާ މެދުވެސް ހަރުކަށި ފިޔަވަޅު އެޅުމަށެވެ. އަދި ކުދި އަދި މެދު ފަންތީގެ ވިޔަފާރިތަކަށް އިތުރު ރައްކާތެރިކަން ފޯރުކޮށްދިނުމަށްވެސް ގިނަ ފަރާތްތަކުން އެދެމުންދެއެވެ.
Advertisement
This content is created and paid for by advertisers and does not involve Voice Journalists
