ފްލެޓްގަތީ މީގެ 5 އަހަރުކުރިން ބޭންކުން ލޯނެއް ނަގައިގެން ކަމަށް ސިއްޙީކަންކަމާބެހޭ ވަޒީރު ޑރ.ޚަލީލު ވިދާޅުވެއްޖެއެވެ.

ހެލްތު މިނިސްޓަރު އަބްދުﷲ ޚަލީލް ވިދާޅުވެފައިވަނީ ހުޅުމާލެ އެފްޑަބްލިއު ރެސިޑަންސްއިން ގަތް 3.1 މިލިއަން ރުފިޔާގެ ފްލެޓު ގަތީ މީގެ ފަސް އަހަރު ކުރިން ބޭންކު ލޯނެއް ނަގައިގެން ކަމަށެވެ.

މި ފްލެޓުގެ މިލްކުވެރިކަން ބަދަލުކުރުމަށް ހައުސިން ޑިވެލޮޕްމަންޓް ކޯޕަރޭޝަނުން ސިވިލް ކޯޓުގައި ރަޖިސްޓްރީ ކުރީ 2023 ވަނަ އަހަރުގެ ޑިސެމްބަރު 25 ވަނަ ދުވަހުއެވެ. ފްލެޓުގެ ރަޖިސްޓްރީ މިނިސްޓަރުގެ ނަމަށް ބަދަލުކޮށްފައިވަނީ 2024 ވަނަ އަހަރުގެ އޮގަސްޓް 7 ވަނަ ދުވަހުއެވެ.

މިނިސްޓަރުކަމާ ހަވާލުވެވަޑައިގެންނެވި ފަހުން މި ފްލެޓު ގަތް ކަމަށް ބުނެ އަދަދު ނޫހުން ކުރި ރިޕޯޓަކާ ގުޅިގެން، އިދިކޮޅު ފަރާތްތަކުން މި މައްސަލަ ތަޙުޤީޤު ކުރަން ޖެހޭ ކަމަށް ބުނެފައިވެއެވެ. މިކަމަށް ރައްދު ދެއްވައި މިނިސްޓަރު ޚަލީލް ވިދާޅުވެފައިވަނީ 2018 ވަނަ އަހަރުގެ އޭޕްރީލް މަހުން ފެށިގެން އެފްޑަބްލިއުއަށް ފައިސާ ދައްކަމުން ގެންދަވާ ކަމަށެވެ. އަދި ފްލެޓު ގަތުމުގެ އެއްބަސްވުމުގައި ސޮއިކުރެއްވީ 2018 ވަނަ އަހަރުގެ އޮގަސްޓް 18 ވަނަ ދުވަހު ކަމަށް ވެސް ވިދާޅުވިއެވެ.

މިނިސްޓަރު އިތުރަށް ހާމަކުރެއްވި ގޮތުގައި، ފްލެޓު ގަތުމަށް އިތުރު ފައިނޭންސް ހޯދާފައިވަނީ ބީއެމްއެލް އިސްލާމިކްގެ ފެސިލިޓީއަކުންނެވެ. އަދި ފްލެޓަށް ދައްކަންޖެހޭ ޖުމްލަ އަގުގެ ތެރެއިން 1.4 މިލިއަން ރުފިޔާ އަދިވެސް ނުދައްކާ އޮތް ކަމަށް ވެސް ވިދާޅުވެފައިވެއެވެ. މި މަޢުލޫމާތުތަކުގެ ޞައްޙަކަން ދެއްކުމަށްޓަކައި، ފްލެޓު ގަތުމުގެ އެއްބަސްވުމުގައި ސޮއިކުރެއްވި ތާރީޚު އެނގޭ ފޮޓޯއެއް ވެސް މިނިސްޓަރު ވަނީ ހިއްސާކުރައްވާފައެވެ.