އަންނަ ހުކުރު ދުވަހު މާލެ ސަރަހައްދުގެ ދެ މިސްކިތެއްގައި ބޭރުގެ ދެ އިމާމުން ހުކުރު ނަމާދު ކުރައްވާނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިރޭ ހާމަކުރައްވައިފިއެވެ.

މިނިސްޓަރު ޝަހީމް ފޭސްބުކްގައި ކުރެއްވި ޕޯސްޓެއްގައި ވިދާޅުވި ގޮތުގައި، ހުޅުމާލޭ ރަޝީދު މިސްކިތުގައި އިމާމުވެ ހުކުރު ނަމާދު ކުރައްވާނީ އޮސްޓްރޭލިއާ ނޭވީގެ އިމާމު މަޖުދީ އީސާއެވެ. އިމާމު މަޖުދީ ޚުތުބާ ދެއްވާނީ އިނގިރޭސި ބަހުންނެވެ. އިމާމު މަޖުދީ ވަނީ މަދީނާގެ އިސްލާމިކް ޔުނިވާސިޓީން ތައުލީމު ހާސިލްކުރައްވާފައެވެ.

އިސްލާމީ މަރުކަޒުގައި ހުކުރު ނަމާދުކުރައްވާނީ މައްކާގެ ހަރަމްފުޅުގެ ފަތުވާ ކޮމިޓީގެ މެންބަރު ޕްރޮފެސަރު ޑރ. ޙަމްދާން އައްސުލާމީއެވެ. ޑރ. ޙަމްދާން ޚުތުބާ ދެއްވާނީ އަރަބި ބަހުންނެވެ. މި ޚުތުބާގެ ދިވެހި ތަރުޖަމާ ޓީވީތަކުން ފެންނާނެ ކަމަށް މިނިސްޓަރު ވިދާޅުވިއެވެ.

Advertisement

އިސްލާމީ މަރުކަޒުގައި ފުރަތަމަ ފަހަރަށް އަރަބި ބަހުން ޚުތުބާއެއް ދެއްވީ އެ މަރުކަޒު ހުޅުވުމުގެ ރަސްމިއްޔާތުގައި މިސްރުގެ ޝައިޚުލްއަޒްހަރު ފަޟީލަތުއް ޝައިޚް ޖާދަލް ޙައްޤު ކަމަށް މިނިސްޓަރު ފާހަގަކުރެއްވިއެވެ.

މިއަހަރުގެ ނޮވެންބަރު 11 ވަނަ ދުވަހަކީ އިސްލާމީ މަރުކަޒަށް 40 އަހަރު ފުރޭ ދުވަސް ކަމަށާއި، އެ މުނާސަބާތާ ގުޅުވައި ރަސްމިއްޔާތެއް ބޭއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު އިރުޝާދު ދެއްވާފައިވާ ކަމަށްވެސް މިނިސްޓަރު ޝަހީމް ވިދާޅުވިއެވެ.