އެއަރޕޯޓްތަކަށް އެމަރޖެންސީ ހާލަތުގައި އެހީތެރިވުމަށް އެމް.ޕީ.އެލް އާއި އާރް.އޭ.ސީ.އެލް އެއްބަސްވުމަކަށް ހިނގައްޖެއެވެ.

ރާއްޖޭގައި އެންމެ ގިނަ ޑޮމެސްޓިކް އެއަރޕޯޓް އޮޕަރޭޓްކުރާ ކުންފުނި ރީޖަނަލް އެއަރޕޯޓްސް ކޮމްޕެނީ (އާރް.އޭ.ސީ.އެލް) އާއި މޯލްޑިވްސް ޕޯޓްސް ލިމިޓެޑް (އެމް.ޕީ.އެލް) އާ ދެމެދު މެމޮރަންޑަމް އޮފް އަންޑަސްޓޭންޑިންގ (އެމް.ޔޫ.އޯ) އެއްގައި ސޮއިކޮށްފައިވަނީ މިއަދުއެވެ.

މި އެމް.ޔޫ.އޯގެ ދަށުން، އެއަރޕޯޓްތަކަށް ދިމާވެދާނެ އެމަރޖެންސީ ހާލަތްތަކުގައި ބޭނުންވާ އެހީތެރިކަން ފޯރުކޮށްދިނުމުގައި އެމް.ޕީ.އެލް ގެ އެހީތެރިކަން އާރް.އޭ.ސީ.އެލް އަށް ލިބިގެންދާނެއެވެ. މިއީ އެއަރޕޯޓްތަކަށް ދިމާވެދާނެ ކުއްލި ހާލަތްތަކުގައި އާރް.އޭ.ސީ.އެލްގެ ޚިދުމަތްތައް މުޅި ރާއްޖެއަށް ފޯރުކޮށްދެވޭނެ މަގު ފަހިކުރުމަށް ވެވުނު އެއްބަސްވުމެކެވެ.

Advertisement

މި އެއްބަސްވުމުގައި އާރް.އޭ.ސީ.އެލްގެ ފަރާތުން ސޮއިކުރެއްވީ އެ ކުންފުނީގެ ޑިރެކްޓަރ އަޙްމަދު މުބީން އެވެ. އަދި އެމް.ޕީ.އެލްގެ ފަރާތުން ސޮއިކުރެއްވީ އެ ކުންފުނީގެ ޗީފް އެގްޒެކެޓިވް އޮފިސަރ މުޙައްމަދު ވަޖީހު އަބްރާހީމް އެވެ.

މި އެއްބަސްވުމުގެ ސަބަބުން، ރާއްޖޭގެ އެކި ކަންކޮޅުތަކުގައި ހުރި އެއަރޕޯޓްތަކަށް ދިމާވެދާނެ އެމަރޖެންސީ ހާލަތްތަކުގައި އަވަސް އަދި ހަރުދަނާ ގޮތެއްގައި އެހީތެރިކަން ފޯރުކޮށްދިނުމަށް މަގުފަހިވެގެންދާނެއެވެ.

މިއީ ރާއްޖޭގެ ވައިގެ ދަތުރުފަތުރުގެ ނިޒާމު އިތުރަށް ހަރުދަނާކުރުމަށް އެޅޭ މުހިންމު ފިޔަވަޅެއް ކަމުގައި ފާހަގަކުރެވެއެވެ.