ސަރުކާރުގެ މަސް ކުންފުނި، މިފްކޯއިން މަސް ބަންދުކުރާ ކާރުޚާނާއެއްގެ ގޮތުގައި ހިންގަމުންދިޔަ ކ. ކަނޑުއޮތްގިރި އެމްއެންޑީއެފްއާ ހަވާލުކޮށްފިއެވެ. މިކަން ހާމަކުރެއްވީ މިއަދު ފިޝަރީޒް މިނިސްޓްރީން ބޭއްވި ނޫސްވެރިންގެ ބައްދަލުވުމެއްގައި ފިޝަރީޒް މިނިސްޓަރު އަހްމަދު ޝިޔާމެވެ.
މިނިސްޓަރު ޝިޔާމް ވިދާޅުވި ގޮތުގައި އެމްއެންޑީއެފްގެ ބޭނުމަށް ކަނޑުއޮތްގިރި ބަދަލުކޮށްފައިވަނީ މިމަހުގެ ހަތަރު ވަނަ ދުވަހުއެވެ. އަދި ކަނޑުއޮތްގިރިއަކީ ބޮޑަށް ކަންނެލި މަސްވެރިކަމަށް ޚާއްޞަކުރެވިގެން ހިންގި ރަށެއް ކަމަށާއި، އެތަނުގެ ތަރައްޤީގެ ޕްލޭންތައް ވެސް ކުރިއަށް ރާވާފައި ހުރީ ވަރަށް ބޮޑަށް ކަންނެލި މަސްވެރިކަމުގައި ހުރި ގޮންޖެހުންތަކަށް ހައްލު ހޯދައިދޭން ކަމަށް އޭނާ ވިދާޅުވިއެވެ.
"ކަންނެލި މަސްވެރިކަމުގައި ހުރި ގޮންޖެހުންތަކަށް ހައްލު ހޯދައިދިނުމަށް އެރަށް ޚާއްޞަކޮށް ދިގު މުއްދަތެއްގެ މަސައްކަތްތަކެއް ކޮށްފައިވޭ. ނަމަވެސް އެ މަސައްކަތްތަކަށް އެދެވޭ ހައްލެއް ކަނޑުއޮތްގިރިން ހޯދިފައެއް ނުވޭ,"
މިނިސްޓަރު ޝިޔާމް ވިދާޅުވިއެވެ.
މީގެ އިތުރުން، ކަނޑުއޮތްގިރި އެމްއެންޑީއެފްއަށް ދިނުމަށް ފަހު، އެރަށުގައި ކުރަމުން އައި މަސް ބަންދުކުރުމުގެ މަސައްކަތަށް ހުޅުމާލެ ބަނދަރުން ޖާގައެއް ހޯދުމުގެ މަސައްކަތް ކުރަމުން އަންނަ ކަމަށް ވެސް މިނިސްޓަރު ޝިޔާމް ވިދާޅުވިއެވެ.
އެޗްޑީސީގެ އެހީތެރިކަމާ އެކު ހުޅުމާލޭ ބަނދަރުން ކަންނެލި މަސްވެރިންނަށް ޖާގަ ލިބޭ ގޮތް ހަދާނެ ކަމަށްވެސް މިނިސްޓަރު ޝިޔާމް ހާމަކުރެއްވިއެވެ.
Advertisement
This content is created and paid for by advertisers and does not involve Voice Journalists
