ނިމިދިޔަ ސަރުކާރުގައި، ފެންމަތިވި އެއްޖިންސުން ގުޅުން ހިންގުމުގެ މައްސަލަ ތަކުގެ ތެރެއިން، އަބްދުއްރަޙްމާން ރަފީޢު (ދޮންދިގު) ނަމަކަށް ކިޔާ ފުލުހަކު އެއްޖިންސުން ގުޅުން ހިންގިކަން ސާބިތު ވެގެން، އޭނާއަށް ދެވުނު އަދަބު ލުއިކޮށްދިނުމަށް ޕްރޮސެކިޔުޓަރ ޖެނެރަލް(ޕީޖީ) އޮފީހުން އެދުނީ އެ އަދަބު ގާނޫނުގައިވާ އަދަބަށްވުރެ ލުއިވުމުން ކަމަށް ޕީޖީ ހުސައިން ޝަމީމް ވިދާޅުވެއްޖެއެވެ.
ޝަމީމް މަގާމުން ވަކި ކުރުމަށް ރައްޔިތުންގެ މަޖިލީހުގެ ކޮމިޓީން ފާސްކޮށްފައިވަނިކޮށް މިއަދު ބޭއްވި ކުއްލި ނޫސްވެރިންގެ ބައްދަލުވުމުގައި ނޫސްވެރިއަކުވަނީ، އަބްދުއްރަޙްމާންގެ އަދަބު ލުއި ކޮށްދިނުމަށް އެދިފައިވާ ސަބަބު ސާފުކޮށްދިނުމަށް އެދިފައެވެ.
އެ ސުވާލަށް ޖަވާބު ދެއްވަމުން ޝަމީމް ވިދާޅުވީ، މައްސަލައެއްގައި ޕީޖީއަށް ކާމިޔާބީ ލިބުނު ނަމަވެސް، އެ މައްސަލާގައި ކުރި ހުކުމަކީ ގާނޫނާ ޚިލާފް ހުކުމެއް ނަމަ އިސްތިއުނާފް ކުރަންޖެހޭ ކަމަށެވެ.
އަޅުގަނޑުމެންނަށް މައްސަލއެއް ކާމިޔާބު ވިޔަސް، ގާނޫނުގައި ބުނާ ގޮތް ނޫން ގޮތަކަށް ހުކުމެއް ކޮށްފިއްޔާ، އަޅުގަނޑުމެން ޖެހޭ އިސްތިއުނާފް ކުރަން. އަޅުގަނޑުމެންގެ ކަމަކީ މީހުންނަށް އަދަބު ދިނުމެއް ނޫން. އަޅުގަނޑުމެންގެ ކަމަކީ ގާނޫނާ އެއްގޮތްވާ ގޮތުގެ މަތީން، އިންސާފް ގާއިމް ކޮށްދިނުން. އެ އިންސާފް ގާއިމް ކުރުމުގެ ތެރޭގައި މީހަކަށް އަނިޔާވެރި ވަންޏާ އަޅުގަނޑުމެން ޖެހޭ އެކަން ހައްލުކޮށްދެން މަސައްކަތް ކުރަން.
ޕީޖީ ހުސައިން ޝަމީމް
ބަންގްލަދޭޝްގެ ރައްޔިތެއް ކަމަށްވާ އަލަމްގީރުއާއެކު އެއްޖިންސުން ޖިންސީ ގުޅުން ހިންގިކަން ސާބިތުވި, ފުލުހުންގެ ޑްރަގް އެންފޯސްމަންޓް ޑިޕާޓްމަންޓްގައި މަސައްކަތް ކުރި އަބްދުއްރަހުމާނު ރާފިއުއަށް ދައުވާ ކުރީ ގާނޫނޫލްއުގޫބާތުގެ ދަށުންނެވެ.
އޭނާއަށް ކްރިމިނަލް އިއްވާފައިވަނީ އެއް އަހަރާއި ދެ މަހާއި 12 ދުވަހުގެ ޖަލު ހުކުމެކެވެ. އެހެންނަމަވެސް، ދައުލަތުން އެދުނީ އަސާސީ މިންގަނޑުން އެއް ދަރަޖަ ދަށްކޮށް ހަތް މަހާއި ހަ ދުވަހަށް ޖަލުގައި ރާފިއު ބަންދުކޮށްދިނުމަށެވެ.
ދައުލަތުން އެފަދައިން އެދިފައިވަނިކޮށް ކްރިމިނަލް ކޯޓުން ހުކުމް އިއްވާފައިވަނީ ދެ ދަރަޖަ މަތިކޮށެވެ. އެހެންކަމުން ޕީޖީ އޮފީހުން ހުކުމާ މެދު ހިތްހަމަނުޖެހޭތީ ހައި ކޯޓަށް ވަނީ އިސްތިއުނާފް ކޮށްފައެވެ.
Advertisement
This content is created and paid for by advertisers and does not involve Voice Journalists
