ލުބުނާނުގައި ތިބި ޗައިނާގެ ރައްޔިތުން އެ ގައުމު ދޫކޮށް ދިއުމަށް އަންގައިފިއެވެ.

ލުބުނާންގައި ތިބި އެ ގައުމުގެ ރައްޔިތުން އެގައުމު ދޫކޮށް ދިއުމަށް އަންގާފައިވަނީ ބުދަ ދުވަހު އިޒްރޭލުން ހަމަލާދީ ލުބުނާންގައި ހުރި ފަލަސްތީނުގެ އިސް ހަނގުރާމަވެރިއެއް މަރާލުމާ ގުޅިގެންނެވެ.

ބެއިރޫތުގައި ހުންނަ ޗައިނާގެ އެމްބަސީން ނެރުނު ބަޔާނުގައި ބުނެފައިވަނީ، ލުބުނާން-އިޒްރޭލު ސަރަހައްދީ އިމުގައި ހިނގާ ހަމަނުޖެހުން ދަނީ ހޫނުވަމުން ކަމަށާއި، ލުބުނާންގެ ސަލާމަތީ ކަންކަން ވަނީ ނުރައްކާތެރި އަދި އޮޅުންބޮޅުން ބޮޑު ހާލަތެއްގައި ކަމަށެވެ. އަދި އެ ގައުމުގެ ރައްޔިތުންނަށް "ވީހާވެސް އަވަހަކަށް" ލުބުނާނުން ފުރައިގެން ދިއުމަށް އިރުޝާދު ދީފައިވެއެވެ.

Advertisement

ޗައިނާއިން ނެރުނު ބަޔާނުގައި ބުނެފައިވާ ގޮތުގައި، ލުބުނާންގެ ދެކުނު ސަރަހައްދަށާއި ނަބަތިއްޔާ ސަރަހައްދަށް ދަތުރުކުރާ ފަރާތްތަކަށް ރަތް އިންޒާރު (އިންތިހާއަށް ނުރައްކާތެރި) އަދި އެހެން ސަރަހައްދުތަކަށް އޮރެންޖް އިންޒާރު (ވަރަށް ނުރައްކާތެރި) ނެރެފައިވެއެވެ. އަދި މި ވަގުތު ލުބުނާނުން ކޮމާޝަލް ފްލައިޓްތައް އޮޕަރޭޓް ކުރާ ކަމަށާއި، މި ފުރުސަތުގެ ބޭނުން ހިފުމަށް ޗައިނާގެ ރައްޔިތުންނަށް އިރުޝާދު ދީފައިވެއެވެ.

ލުބުނާނުގައި ދިރިއުޅޭ އެހެން ބައެއް ގައުމުތަކުގެ ރައްޔިތުންނަށް ވެސް އެ ގައުމު ދޫކޮށް ދިއުމަށް އެ ގައުމުތަކުގެ ސަރުކާރުތަކުން ވަނީ އަންގާފައެވެ. މިއީ އެ ސަރަހައްދުގައި އިތުރަށް ހަމަނުޖެހުން ހޫނުވެދާނެ ކަމުގެ ބިރަށް އަޅާ ފިޔަވަޅެއް ކަމަށް ބެލެވެއެވެ.