އިރުމަތީ އެފްރިކާގެ ޤައުމެއް ކަމަށްވާ ޔުގެންޑާއިން މަކުނު ވިދުރީގެ  ކްލޭޑް 1ބީ އަށް 2 މީހުން ފައްސިވެއްޖެއެވެ.

ޔުގެންޑާގެ ހެލްތު މިނިސްޓްރީން ބުނީ ޕޮޒިޓިވްވި މީހުންގެ ތެރެއިން އެކަކީ ޓްރަކް ޑްރައިވަރެއް ކަމަށާއި އެ ދެ މީހުންވެސް ތިބީ ވެރިރަށުގެ ދެކުނުން އޮންނަ އެންޓެބެގެ ހޮސްޕިޓަލެއްގައި ކަމަށެވެ. އަދި އެކަހެރިކޮށް ބައިތިއްބައިގެން އެ ދެ މީހުންނަށްވެސް ފަރުވާދެމުންދާކަމަށް އެޤައުމުގެ ސިއްހަތާ ބެހޭ ވުޒާރާއިން ބުނެއެވެ.

އެމްޕޮކްސް ފެތުރެމުންދާއިރު، 1ބީ ގެ ކޭސްތަކާ މެދު ކަންބޮޑުވުން ތައް އިތުރުވަމިންދާކަމަށް ދުނިޔޭގެ ސިއްހަތާބެހޭ ޖަމިއްޔާ ޑަބްލިއު އެޗްއޯއިން ވަނީ ބުނެފައެވެ.

މި ހާތަނަށް ބުރުންޑީ، ކެމަރޫން، ސެންޓްރަލް އެފްރިކަން ރިޕަބްލިކް، ޑިމޮކްރެޓިކް ރިޕަބްލިކް އޮފް ކޮންގޯ، ގާނާ، އައިވަރީ ކޯސްޓް، ކެންޔާ، ލައިބީރިއާ، މޮޒަމްބިކް، ނައިޖީރިއާ، ޕާކިސްތާން، ފިލިޕީންސް، ރިޕަބްލިކް އޮފް ކޮންގޯ، ރުވާންޑާ، ސައުތު އެފްރިކާ، ސްވިޑަން، ތައިލެންޑް އަދި ޔުގެންޑާއިންވަނީ މަކުނު ވިދުރި ފެނިފައެވެ.

ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ވަނީ މި ވައިރަހަކީ ބައިނަލްއަގުވާމީ ގޮތުން ކަންބޮޑުވާ އާންމު ސިއްހަތުގެ ކުއްލި ނުރައްކަލުގެ ހާލަތެއްގެ ގޮތުގައި ކަނޑައަޅާފައެވެ. ނަމަވެސް އެމްޕޮކްސް އަކީ "އާ ކޮވިޑް ނޫން" ކަމަށްވެސް ވަނީ ބުނެފައެވެ.
މިއީ ފާއިތުވި ދެ އަހަރުގެ ތެރޭގައި ދުނިޔޭގެ ސިއްހަތާ ބެހޭ އިދާރާއިން އެމްޕޮކްސްއާ ގުޅިގެން އިމަޖެންސީ އެލާޓް ނެރުނު ދެވަނަ ފަހަރެވެ.

މިހާރު ފެތުރެމުންދާ ބަލިމަޑުކަމަކީ ހަންގަނޑާއި ހަންގަނޑާ ގުޅޭ ޒަރިއްޔާއިން ފެތުރޭ ނުރައްކާތެރި ވޭރިއަންޓެކެވެ.

އެމްޕޮކްސް އެންމެ ފުރަތަމަ ފެނިފައިވާކަމަށް ރެކޯޑްތަކުން ދައްކަނީ އެފްރިކާއިންނެވެ.