މަޖީދިއްޔާ ސްކޫލްގައި 40 ކްލާސްރޫމްގެ އާ އިމާރާތެއް އަޅަން ސަރުކާރުން ނިންމައިފައިވާކަން ރައީސް ޑރ.މުޢިއްޒު ހާމަކުރައްވައިފިއެވެ.

މަޖީދިއްޔާ ސްކޫލްގެ އަހަރީ ދުވަހާ ގުޅިގެން ބޭއްވުނު ރަސްމިއްޔާތުގައި މިރޭ ވާހަކަފުޅު ދައްކަވަމުން ރައީސް މުޢިއްޒު ވިދާޅުވީ، އަލަށް އަޅާ މި އިމާރާތުގައި ހިމެނޭ ބައެއް ކްލާސްރޫމްތަކަކީ ރާއްޖޭގެ ފުރަތަމަ ސްމާޓް ކްލާސްރޫމްތަކަށް ވެގެންދާނެ ކަމަށާއި، އަދި މި އިމާރާތް އަޅާނީ ކުރީގެ ދަރުމަވަންތަ ސްކޫލް ހިންގި ބިމުގައި ކަމަށް ވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިރޭ ވިދާޅުވިއެވެ.

މީގެ އިތުރުން، މަޖީދިއްޔާ ސްކޫލްގެ ފަޚުރު ކަމަށްވާ ދާރުލްއުލޫމް، ނޭޝަނަލް އެޑިއުކޭޝަނަލް މިއުޒިއަމްއެއްގެ ގޮތުގައި ތަރައްޤީ ކުރަން ނިންމާފައިވާ ކަމަށްވެސް ރައީސް ހާމަކުރެއްވިއެވެ. މި މިއުޒިއަމްއިން ރާއްޖޭގެ ތަޢުލީމީ ހަޔާތުގެ ތާރީޚު ދައްކުވައިދޭނެ ކަމަށް ރައީސް ވިދާޅުވިއެވެ.

މި މަޝްރޫޢުތަކަކީ ސަރުކާރުން ތަޢުލީމީ ދާއިރާ ކުރިއެރުވުމަށް ކުރަމުންދާ މަސައްކަތްތަކުގެ ތެރެއިން ބައެއް ކަމަށްވެސް އެމަނިކުފާނު ވިދާޅުވިއެވެ. އާ އިމާރާތް އެޅުމާއެކު މަޖީދިއްޔާ ސްކޫލަށް އިތުރު ޖާގަ ލިބި، ކިޔަވައިދިނުމުގެ ފެންވަރު އިތުރަށް ރަނގަޅުވެގެންދާނެ ކަމަށް ވެސް މިރޭގެ ވާހަކަފުޅުގައި އެމަނިކުފާނު ވިދާޅުވިއެވެ.