ކުރީގެ ސަރުކާރުން ގެއްލުމުގެ ބަދަލުގެ ގޮތުގައި އެކި ފަރާތްތަކަށް ދޫކޮށްލާފައިވާ އެއް ބިލިއަން ރުފިޔާގެ އެސެޓް ދޫކޮށްފައިވަނީ ގާނޫނާ ޚިލާފަށް ކަމަށް ބަންޑާރަ ނައިބު އަހުމަދު އުޝާމް ވިދާޅުވެއްޖެއެވެ. އަދި މި އެއްބަސްވުންތައް ބާތިލުކުރުމުގެ މަސައްކަތް ކުރަމުންދާ ކަމަށް ވެސް އޭނާ ވިދާޅުވިއެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި އުޝާމް ވިދާޅުވީ، ކުރީގެ ސަރުކާރުގެ ބަދަލު ދިނުމާ ބެހޭ ކޮމިޓީން 10 ފަރާތަކަށް ބަދަލު ދިނުމަށް ނިންމާފައިވާ ކަމަށެވެ. މީގެ ތެރޭގައި ފައިސާގެ އިތުރުން ރިސޯޓާއި ފަޅު ވެސް ހިމެނެއެވެ. ނަމަވެސް މި ގިނަ މައްސަލަތަކުގައި ބަދަލު ދީފައިވަނީ ގާނޫނާ ޚިލާފަށް ކަމަށް އޭނާ ފާހަގަކުރެއްވިއެވެ.
އުޝާމް އިތުރަށް ވިދާޅުވީ، ވެރިކަން ބަދަލުވުމުގެ އިންތިގާލީ މަރުހަލާގައި، ކޮމިޓީއަށް ހުށަހެޅުމަކާ ނުލައި ވެސް ދައުލަތުގެ އެތައް ސަތޭކަ މިލިއަން ރުފިޔާގެ އަގުހުރި އެސެޓްތައް ބަދަލުގެ ގޮތުގައި ދޫކޮށްފައިވާ ކަމަށެވެ.
"ވެރިކަން ބަދަލުވުމުގެ އިންތިގާލީ މަރުހަލާގައި، ކޮމިޓީއަށް ހުށަހެޅުމަކާ ނުލައި ވެސް ދައުލަތުގެ އެތައް ސަތޭކަ މިލިއަން ރުފިޔާގެ އަގުހުރި އެސެޓްތައް ބަދަލުގެ ގޮތުގައި ދޫކޮށްފައިވޭ"
ބަންޑާރަނައިބު
ބަންޑާރަ ނައިބުގެ އޮފީހުން ޚާއްސަ ޓީމެއް ނަގައިގެން މި މައްސަލަތައް ބަލަމުންދާ ކަމަށާއި، މިހާތަނަށް ބެލި ބެލުމުން ގިނަ މައްސަލަތަކުގައި ބަދަލު ދީފައިވަނީ ގާނޫނާ ޚިލާފަށްކަން ފާހަގަކުރެވިފައިވާ ކަމަށް އުޝާމް ވިދާޅުވިއެވެ. ގާނޫނާ ޚިލާފަށް ދީފައިވާ ހުރިހާ ބަދަލެއްގެ އެއްބަސްވުން ބާތިލުކުރާނެ ކަމަށް ވެސް އޭނާ އިތުރުކުރެއްވިއެވެ.
އުޝާމް ވިދާޅުވީ، ޝަރީޢަތަށް ހުށަހަޅައިގެން ބާތިލުކުރަން ޖެހޭ މައްސަލަތައް އެގޮތަށް ކުރިއަށް ގެންދާނެ ކަމަށާއި، ޝަރީޢަތަށް ހުށަނާޅާ ބާތިލުކުރެވެން ހުރި މައްސަލަތައް ވެސް ބާތިލުކުރުމުގެ މަސައްކަތް ކުރިއަށްދާ ކަމަށެވެ. މި މަސައްކަތް ވަރަށް އަވަހަށް ނިންމާލެވޭނެ ކަމަށް ވެސް އޭނާ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
