މިޔަންމާގެ އަސްކަރިއްޔާއިން ހިންގަމުންދާ ހަމަނުޖެހުންތަކަށް ހަތް އަހަރު ފުރުމުގެ މުނާސަބަތުގައި ބަންގްލަދޭޝްގައި ތިބި ރޮހިންޖާ ރެފިއުޖީންގެ އެތައް ހާސް ބަޔަކު ކޭމްޕްތަކުގައި އެއްވުންތަކެއް ބާއްވައިފައިވާ ކަމަށް މީޑިއާތަކުން ރިޕޯޓުކޮށްފިއެވެ.

ހަމަނުޖެހުންތައް ހުއްޓާލައި އެމީހުން ރައްކާތެރިކަމާއެކު މިޔަންމާއަށް އެނބުރި ދިއުމަށް ފުރުސަތު ދިނުމަށް ވަނީ އެމީހުން ގޮވާލާފައެވެ.

މި މުޖާހަރާގައި ކުޑަކުދިން އިން ފެށިގެން އުމުރުން ދުވަސްވީ މީހުންނާ ހަމައަށް ރެފިއުޖީން ވަނީ އާދީއްތަ ދުވަހު އަޑުއުފުލާފައެވެ.

ގިނަބަޔަކު "ރޮހިންޖާ ޖެނޮސައިޑް ރިމެމްބަރެންސް" ލިޔެފައި ހުރި  ރިބަންތައް ވެސް ގިނަ ބަޔަކު ބޮލުގައި އައްސައިގެން ތިބިކަމަށް މީޑިއާތަކުންވަނީ ރިޕޯޓުކޮށްފައެވެ.

"އަހަރެމެން ރޮހިންޖާ މީހުންނަކީ މިޔަންމާގެ ރައްޔިތުން،" އެ މީހުންގެ ބޯޑުތަކުގައި ލިޔެފައިހުއްޓެވެ.

ރޮހިންޖާ ދަރިކޮޅުގެ މީހުންނަށް ދޭ ހަމަލާތައް ހުއްޓާލާ،" ރެފިއުޖީ ހާފިޒުއްރަހްމާން ރޮއިޓާސް ނިއުސް އެޖެންސީއާވާހަކަދައްކަމުން ބުނެފައިވެއެވެ.

މިޔަންމާ ގެ އަސްކަރިއްޔާއިން ކުރިއައްގެދިޔަ ހަމަނުޖެހުމުގެ ސަބަބުން 2017 ވަނަ އަހަރު 750،000 ރޮހިންޖާ ދަރިކޮޅުގެ މީހުން އަވަށްޓެރި ބަންގްލަދޭޝްއަށް ހިޖުރަކުރި އިރު، މިޔަންމާ ގެ އަސްކަރިއްޔާއިން މިހާރު ވަނީ ބައިނަލްއަގްވާމީ ކޯޓް އޮފް ޖަސްޓިސްގައި ގަތުލުއާންމުގެ މައްސަލައެއް ފެންމަތިވެފައެވެ.

މިޔަންމާގެ ހުޅަނގުގެ ރަކީން ސްޓޭޓްގެ އަސްކަރީ ސަރުކާރާއި ބުޑިސްޓުން ރެކްރޫޓްކުރާ ބާރުގަދަ ނަސްލުގެ ހަތިޔާރު އެޅި ޖަމާއަތެއް ކަމަށްވާ އަރަކަން އާމީއާ ދެމެދު ހިނގަމުންދާ ހަމަނުޖެހުންތައް ހޫނުވުމުގެ ސަބަބުން ފާއިތުވި ހަފުތާތަކުގައި ރޮހިންޖާ ދަރިކޮޅުގެ އިތުރު އެތައް ހާސް ބަޔަކު ވަނީ ބަންގްލަދޭޝްއަށް ހިޖުރަކޮށްފައެވެ.