ބެއިރޫތު (އޮގަސްޓް 25) - ހިޒްބުالله ޖަމާއަތުން އިސްރާއީލުގެ އަސްކަރީ އަމާޒުތަކަށް ދިން ރޮކެޓާއި ޑްރޯން ހަމަލާގައި ލިބުނު ގެއްލުން ދެނެގަތުމުގެ ކުރިން، ހިޒްބުﷲ އަވަހާރަކޮށްލި ކޮމާންޑަރެއްގެ ބަދަލު ހިފުމަށް އިތުރު ހަމަލާތަކެއް ނުދޭނޭ ކަމަށް ހިޒްބުاللهގެ ލީޑަރު ސައްޔިދު ހަސަން ނަސްރުالله ވިދާޅުވެއްޖެ އެވެ.

ލުބުނާނުގެ ހަތިޔާރު އެޅި ޖަމާއަތުގެ ލީޑަރު ޓީވީ މެދުވެރިކޮށް ވިދާޅުވީ އެ ޖަމާއަތުގެ ހަމަލާތައް "ރޭވިފައިވާ ގޮތަށް" ކުރިއަށް ގެންދެވިފައިވާ ކަމަށެވެ.

އަދި އިސްރާއީލުގެ އަސްކަރިއްޔާއިން ކުރިން ދިން ހަމަލާތަކުގެ ސަބަބުން އެ ޖަމާއަތުން ދޭން އުޅުނު ބޮޑު ހަމަލާއެއް ހުއްޓުވި ކަމަށް އިސްރާއީލުން ދެއްކި ވާހަކަތައް ވަނީ ނަސްރުﷲ ދޮގުކުރައްވާފައެވެ.

 ހިޒްބުالله އާއި އިސްރާއީލާ ދެމެދު ހިނގި ހަމަނުޖެހުންތަކަށް ފަހު އެންމެ ވަރުގަދަ ހަމަލާތައް ބަދަލުކުރިތާ ގާތްގަނޑަކަށް 12 ގަޑިއިރު ފަހުން ވާހަކަ ދައްކަވަމުން ނަސްރުالله ވިދާޅުވީ، ތެލްއަވީވްގެ ބެން ގުރިއަން އެއާޕޯޓު ފަދަ އާންމުންނަށް ނުވަތަ އާންމު އުމްރާނީ ވަސީލަތްތަކަށް އަމާޒުކޮށް އެ ޖަމާއަތުން ހަމަލާދީފައިނުވާނޭކަމަށެވެ.

އޭނާ އިތިރަށް ވިދާޅުވީ އެ ޖަމާއަތުގެ އެންމެ ބޮޑު ޓާގެޓަކީ އިޒްރޭލުގެ ސަރަހައްދުގެ 110 ކިލޯމީޓަރު (70 މޭލު) ބޭރުގައި ހުންނަ އަސްކަރީ އިންޓެލިޖެންސް ބޭސްއެއް ކަމަށާއި އެއީ މިހާތަނަށް ދިން އެންމެ ވަރުގަދަ ހަމަލާ ކަމަށާއި އެއީ ތެލްއަވީވްގެ އުތުރުން އެންމެ 1.5 ކިލޯމީޓަރު (1 މޭލު) ދުރުގައި ހުންނަ ތަނެއްކަމަށެވެ.

ނަސްރުالله ވިދާޅުވީ މިދިޔަ މަހު އިޒްރޭލުން ހިޒްބުاللهގެ އިސް ކޮމާންޑަރު ފުއާދު ޝުކްރު ބެއިރޫތުގެ އައްސޭރިފަށުގައި މަރާލުމުން ބަދަލު ހިފުމުގެ ގޮތުން އެ ޖަމާއަތުން ކުރިއަށްގެންދިޔަ އެ އޮޕަރޭޝަންގެ ނަތީޖާ ބަލާނެ ކަމަށެވެ.

ނަތީޖާ ނުފުދޭނަމަ އަނެއްކާވެސް ރައްދު އަލިންދޭނޭކަމަށްވެސް ނަސްރުﷲ ވަނީ ވިދާޅުވެފައެވެ.