ކާބޯތަކެތި ވިއްކާ ތަންތަނުގެ ލައިސަންސް އާކުރުން ތިން މަސްދުވަހަށް ފަސްކޮށްފިއެވެ.
ފާއިތުވި ހަފުތާގައި ތަންފީޒުކުރަން ފެށި ކާބޯތަކެތީގެ ރައްކާތެރިކަމުގެ އައު ޤާނޫނުގެ ދަށުން، މިހާރު ރަޖިސްޓަރީކޮށްގެން ހިންގަމުންދާ ކާބޯތަކެތީގެ ވިޔަފާރިތަކުގެ ހުއްދަ އައުކުރުމުގެ މުއްދަތު ގާތްގަނޑަކަށް ތިން މަސްދުވަހަށް ލަސްކޮށްދިނުމަށް މިއަދު ވަނީ ނިންމާފައެވެ.
މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ނެރުނު އިޢުލާނެއްގައި ހާމަކޮށްފައިވާ ގޮތުގައި، އައު ޤާނޫނަށް ޢަމަލުކުރަން ފެށުމުގެ ކުރިން އެ އޮތޯރިޓީގައި ނުވަތަ އެހެން އިދާރާއެއްގައި ރަޖިސްޓަރީކޮށްފައިވާ ކާބޯތަކެތީގެ ޚިދުމަތްދޭ ތަންތަނާއި ފަރާތްތަކަށް ދޫކޮށްފައިވާ ހުއްދައިގެ މުއްދަތު އަންނަ ނޮވެމްބަރު 23 އާ ހަމައަށް ދިގުކޮށްދީފައިވެއެވެ.
އެމްއެފްޑީއޭ އިން އިތުރަށް ބަޔާންކޮށްފައިވަނީ، ކާބޯތަކެތީގެ ޚިދުމަތްދޭ ތަންތަނުގެ ތެރެއިން އަލަށް ހުއްދައަށް އެދޭ ހޮޓާ، ކެފޭ އަދި ރެސްޓޯރަންޓް ފަދަ ތަންތަނުން ޚިދުމަތަށް އެދި ހުށަހަޅާނީ "ވަންގަވް" ޕޯޓަލް މެދުވެރިކޮށް ކަމަށެވެ.
މީގެ އިތުރުން، ކާބޯތަކެއްޗާއި ބޯފެން އުފައްދާ ފެކްޓަރީތައް ރަޖިސްޓަރީކުރުމާއި، އާމްދަނީ ހޯދުމަށް ގޭގައި ކާބޯތަކެތި ތައްޔާރުކުރާ ފަރާތްތައް ދަފްތަރުކުރުން ކުރިއަށް ގެންދާނީ އެ އޮތޯރިޓީގެ އޮންލައިން ޕޯޓަލް "ދިރިތި" މެދުވެރިކޮށް ކަމަށްވެސް އެމްއެފްޑީއޭ އިން ފާހަގަކޮށްފައިވެއެވެ.
ފާހަގަކޮށްލެވޭ ކަމަކީ، ކާބޯތަކެތީގެ ސަލާމަތާ ބެހޭ ޤާނޫނުގެ ދަށުން ވަރުގަދަ ބާރުތަކަކާއެކު "މޯލްޑިވްސް ފުޑް އެންޑް ޑްރަގް އޮތޯރިޓީ" އަލުން އުފެއްދިފައިވަނީ ފާއިތުވި ހަފުތާގައި ކަމެވެ.
Advertisement
This content is created and paid for by advertisers and does not involve Voice Journalists
