ރާއްޖޭން ބޭރު ފައިސާ ލިބޭ މީހުން ބޭންކަށް ޑޮލަރު މާރުކުރަން މަޖުބޫރުކުރާނެކަމަށް ރައީސް ޑރ.މުޙައްމަދު މުޢިއްޒު ވިދާޅުވެއްޖެއެވެ. ރައީސް މިފަދައިން ވިދާޅުވީ، މި ރޭ ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ގެ ޖަގަހައިގައި ބޭއްވުނު ޖަލްސާގައި ވާހަކަފުޅު ދައްކަވަމުންނެވެ.
ރައީސް ވިދާޅުވީ، މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ރެގިއުލޭޝަނަށް ބަދަލުގެނައުމުން ޑޮލަރުގެ އަގު ހިފެހެއްޓޭނެކަމަށެވެ. މިގޮތުން، ރާއްޖޭން ބޭރުން ފައިސާ ލިބޭ ފަރާތްތަކުން އެ ފައިސާ ބޭންކަށް މާރުކުރުމަށް މަޖުބޫރުކުރެވޭނެ ކަމަށް ރައީސް ވިދާޅުވިއެވެ.
"މި ބަދަލުގެ ނަތީޖާއަކަށް ވާނީ، ރާއްޖޭގައި ގިނަ އަދަދަކަށް ހިންގަމުންދާ ބޭރު ފައިސާއިން އާމްދަނީ ލިބޭ ވިޔަފާރިތަކުން، މިހާރު ބްލެކް މާކެޓުގައި ކުރަމުންދާ ފައިސާ މާރުކުރުން ހުއްޓި، ބޭންކު މެދުވެރިކޮށް މާރުކުރުމަށް މަޖުބޫރުވުމެވެ،"
ރައީސް ވިދާޅުވިއެވެ.
އެމަނިކުފާނު އިތުރަށް ވިދާޅުވީ، ރާއްޖެއަށް އަންނަ ސީދާ ބޭރުގެ އިންވެސްޓްމަންޓްތަކުގެ ފައިދާ ރާއްޖޭގެ ބޭންކުތަކުގައި ދެމެހެއްޓުމަށް ހިތްވަރުދޭ ގޮތަށް، ސީދާ ބޭރުގެ އިންވެސްޓްމަންޓާއި ވިޔަފާރީގެ ފައިދާއިން ނަގާ ޓެކްސްގެ ޤަވާއިދުތައް ވެސް އިޞްލާޙު ކުރައްވާނެ ކަމަށެވެ.
"މިކަމުގެ ސަބަބުން، ރާއްޖޭގައި ޑޮލަރު ހިފެހެއްޓުމަށް ބާރުއެޅި، ދިގު މުއްދަތަކަށް ރާއްޖޭގައި ޑޮލަރު ދެމެހެއްޓިގެންދާނެ. މީގެން ވެސް ރާއްޖެއަށް ނަފާ ލިބިގެންދާނެއެވެ،"
ރައީސް ވިދާޅުވިއެވެ.
މީގެ އިތުރުން، ޑޮލަރު މާރުކުރާ ތަންތަން ހުންނާނީ ބޭންކުތަކާ ގުޅިފައިކަން ފާހަގަކުރައްވައި، ރައީސް ވިދާޅުވީ ބޭންކުތަކުން އެފަދަ ތަންތަން ގާތުން މޮނިޓަރ ކުރަމުންދާނެ ކަމަށެވެ.
މިފަދަ ގިނަ ތަންތަން ހިންގަނީ ބޭރު ޤައުމުތަކުގެ ފަރާތްތަކުން ކަމަށް ފާހަގަކުރައްވައި، ރައީސް ވަނީ ބޭންކުތަކުން އިޢުލާނުކުރާ ރޭޓަށްވުރެ މަތީ އަގެއްގައި މިފަދަ ތަންތަނުން ޑޮލަރު މާރުކުރަން އުޅޭނަމަ، ރައްޔިތުން އެފަދަ ތަންތަނަށް ނުދިއުމަށް އިލްތިމާސްކުރައްވާފައެވެ.
ރާއްޖޭގައި ޑޮލަރުގެ ދަތިކަން ޙައްލުކުރުމަށް ސަރުކާރުން އަޅަމުންދާ ފިޔަވަޅުތަކުގެ ތެރެއިން މިއީ އެއް ފިޔަވަޅެވެ. މި ފިޔަވަޅުގެ ސަބަބުން ރާއްޖޭގެ ބޭންކުތަކަށް ލިބޭ ޑޮލަރުގެ އަދަދު އިތުރުވެ، ޑޮލަރުގެ މައްސަލަ ހައްލުވާނެކަމަށް ބެލެވެއެވެ.
Advertisement
This content is created and paid for by advertisers and does not involve Voice Journalists
