މެލޭޝިއާގެ ކުރީގެ ބޮޑުވަޒީރު މުހްޔިއްދީން ޔާސީނަށް އެގައުމުގެ ކުރީގެ ރަސްގެފާނަށް ފުރައްސާރަކުރި ކަމުގެ ތުހުމަތުގައި އޭނާގެ މައްޗަށް ދައުލަތުން ގައުމިއްޔަތާ ހިލާފު ވިކަމުގެ ދައުވާ އުފުލާފައިވާކަމަށް މީޑިއާތަކުން ބުނެފިއެވެ.
މުހްޔިއްދީން އަންގާރަ ދުވަހުގެ ހެނދުނު އިރުއުތުރުގެ އަވަށެއް ކަމަށްވާ ގުއާ މުސަންގްގެ ކޯޓަށް ހާޒިރުވެ، ކުށަށް އިއުތިރާފުވެފައިނުވާ ކަމަށް މީޑިއާތަކުން ވަނީ ބުނެފައެވެ.
މި ދައުވާއަކީ އޭނާގެ ކޮންޒަވޭޓިވް ޕެރިކަޓަން ނޭޝަނަލް ކޯލިޝަނަށް ސްޓޭޓް އިންތިޚާބެއްގައި ކެމްޕެއިން ކުރައްވަމުން ގެންދަވަނިކޮށް އޮގަސްޓް މަހުގެ 14 ވަނަ ދުވަހު ދެއްކެވި ވާހަކަތަކުގެ ސަބަބުން އުފުލޭދައުވާއެކެވެ.
އޭނާގެ މައްޗަށް ކުށް ސާބިތުވެއްޖެ ނަމަ ތިން އަހަރުގެ ޖަލު ހުކުމެއް އަންނާނެކަމަށްވެސްވަނީ ބުނެފައެވެ.
މެލޭޝިއާގެ ނޫސްތަކުން ބުނި ގޮތުގައި 2022 ވަނަ އަހަރުގެ ނޮވެމްބަރު މަހު ބޭއްވި އިންތިހާބަށް ފަހު އޭރުގެ ރަސްގެފާނު ސުލްތާން އަބްދުالله ސުލްތާން އަހްމަދު ޝާހު ބޮޑުވަޒީރު ކަމަށް ދައުވަތު ނުދެއްވީ ކީއްވެތޯ މުހްޔިއްދީން ސުވާލު އުފައްދާފައިވާ ކަމަށެވެ.
ރިޕޯޓްތައް ބުނާ ގޮތުން މުހްޔިއްދީން ވާހަަކަދައްކަމުން ވިދާޅުވީ ސަރުކާރެއް އުފެއްދުމަށް އޭނާ އަކީ މެމްބަރުންގެ ތާއީދު އޮތް ސިޔާސީ ލީޑަރަކީ ކަމަށެވެ.
މި މައްސަލައާ ގުޅިގެން ސުލްތާން އަބްދުالله އެއްވެސް އެއްޗެއް ވިދާޅުވެފައެއް ނުވެއެވެ.
ނަމަވެސް އޭނާގެ ދަރިކަލުން މުހްޔިއްދީނަށް ވަރުގަދަ ބަހުގެ ހަމަލާތަކެއް ދެއްވާ ވިދާޅުވީ މުޖްޔުއްދީން ދެއްކީ ވަރަށް ނުރައްކާތެރި ވާހަކަތަކެއް ކަމަށާއި އެކަމުގެ ސަބަބުން ރައްޔިތުން ބައިބައިވެ ޝާހީ މުއައްސަސާއަށް ކުރާ އިތުބާރު ގެއްލޭނެ ކަމަށެވެ.
މުހްޔިއްދީން ވަނީ ރޯޔަލްޓީއަށް ފުރައްސާރަ ކުރި ކަމަށް ބުނި ވާހަކަ ދޮގުކުރައްވައި، އޭނާ ދެއްކެވި ވާހަކަތަކަކީ ހަގީގަތާ ހިލާފު ވާހަކަތަކެއް ކަމަށް ވިދާޅުވެފަ އެވެ.
މެދު ތެރޭގެ ސްޓޭޓެއް ކަމަށްވާ ޕަހަންގްއަށް ނިސްބަތްވާ އަލްސުލްތާން އަބްދުاللهގެ ބަދަލުގައި މިދިޔަ ޖެނުއަރީ މަހުގެ ތެރޭގައި ދެކުނުގެ ސްޓޭޓެއް ކަމަށްވާ ޖޯހޯރުގެ ސުލްޠާން އިބްރާހިމް ސުލްތާން އިސްކަންދަރު ވަނީ އައްޔަނު ކޮށްފައެވެ.
Advertisement
This content is created and paid for by advertisers and does not involve Voice Journalists
