ޓެކްސް އެޕީލް ޓްރައިބިއުނަލްގެ ހަތަރު މެންބަރަކު މަގާމުން ވަކިކުރަން ރައްޔިތުންގެ މަޖިލީހުން ލަފާދީފައި ވާތީ ރައީސް ޑރ. މުހައްމަދު މުއިއްޒު އެ ހަތަރު މެންބަރުން އިއްޔެ މަގާމުން ވަކި ކުރައްވައިފިއެވެ.
ޓެކްސް އެޕީލް ޓްރައިބިއުނަލުން ވަކިކުރި މެންބަރުން:
1. މުހައްމަދު މުނައްވަރު އަލީ - ރައީސް
2. ހުސައިން ޒައިދާން ޖަލީލް - ނައިބު ރައީސް
3. އަހުމަދު އަޝްރަފް - މެންބަރު
4. ހަދީޖާ ނައީމް - މެންބަރު
މަޖިލީހުގެ ޖުޑީޝަރީ ކޮމިޓީން ޓެކްސް އެޕީލް ޓްރައިބިއުނަލްގެ މެންބަރުންގެ މައްސަލަ ބެލުމަށްފަހު، މަޖިލީހުގެ ތަޅުމުން ފާސްކޮށްފައިވަނީ އެ ޓްރައިބިއުނަލްގެ އެއް މެންބަރު ފިޔަވައި ހުރިހާ މެންބަރުން ވަކި ކުރުމަށެވެ. މަގާމުން ވަކިނުކުރަން ނިންމީ ޓްރައިބިއުނަލްގެ މެންބަރު އިސްމާއީލް ސާޖިދު އެކަންޏެވެ.
މި މެންބަރުން ވަކިކުރުމަށް ރައީސް މުއިއްޒަށް ލަފާއެރުވީ މިމަހުގެ 19 ވަނަ ދުވަހުއެވެ. މި ލަފާ އާއި އެއްގޮތަށް މަގާމުން ވަކިކުރިކަން ރައީސް އޮފީހުން އިއްޔެ ވަނީ އެ މެމްބަރުންނަށް އަންގާފައެވެ.
ޓްރައިބިއުނަލް ހަތަރު މެމްބަރަކު ވަކިކުރަން ރައީސަށް ލަފާ އަރުވަން ފެންނަކަމަށް ފާސްކޮށްފައިވަނީ 63 މެންބަރުން ވޯޓުންނެވެ.
ކޮމިޓީއިން ބެލިބެލުމުގައި ޓްރައިބިއުނަލް ބައެއް މެންބަރުންގެ މައްޗަށް މަގާމުގެ ނުފޫޒު ބޭނުން ކުރުމާއި ނުހައްގު މުއްސަނދިކަން ހޯދިކަމަށް ތުހުމަތު ކުރެވޭއިރު މި މައްސަލަ ބެލުމަށް އޭސީސީއަށް ވަނީ ހުށަހަޅާފައެވެ.
Advertisement
This content is created and paid for by advertisers and does not involve Voice Journalists
